'പാവപ്പെട്ടവന്റെ കിടപ്പാടങ്ങൾക്ക് മീതെ ബുൾഡോസർ കയറ്റിയിറക്കുന്നത് മറച്ചുവച്ച് കേരളത്തെ പഠിപ്പിക്കുന്നു'; രേവന്ത് റെഡ്ഡിക്കെതിരെ പിണറായി

പാവപ്പെട്ടവന്റെ കിടപ്പാടങ്ങൾക്ക് മുകളിൽ ബുൾഡോസർ കയറ്റിയിറക്കുന്നത് മറച്ചുവെച്ച് സാമൂഹ്യപുരോഗതിയെ കുറിച്ചും ജനക്ഷേമത്തെ ‌കുറിച്ചും കേരളത്തെ പഠിപ്പിക്കുകയാണെന്ന് മുഖ്യമന്ത്രി ഫെയ്സ്ബുക്കിലൂടെ വിമർശിച്ചു. ശമ്പളവും പെന്‍ഷനുകളും നിരന്തരം മുടക്കുന്ന ഒരു സര്‍ക്കാരിനെ നയിക്കുന്ന മുഖ്യമന്ത്രിയില്‍ നിന്ന് കേരളത്തിന് പഠിക്കാൻ ഒന്നുമില്ലെന്നും അദ്ദേഹം പറഞ്ഞു.

ദൈവത്തിന്‍റെ സ്വന്തം നാട്ടില്‍ ദൈവത്തിനും സ്വത്തിനും രക്ഷയില്ലെന്ന് രേവന്ത് റെഡ്ഡി കഴിഞ്ഞ ദിവസം പറഞ്ഞിരുന്നു. പിണറായി വിജയന്റെ എക്പയറി ഡേറ്റ് കഴിഞ്ഞുവെന്നും നീ പോ മോനേ വിജയാ എന്നും രേവന്ത് റെഡ്ഡി പരാമർശിച്ചിരുന്നു.

ഫെയ്സ്ബുക്ക് കുറിപ്പിന്റെ പൂർണരൂപം

ട്രഷറി അടഞ്ഞു കിടന്നിരുന്ന, ക്ഷേമ പെൻഷനുകൾ മാസങ്ങളോളം കുടിശ്ശികയാക്കിയിരുന്ന യുഡിഎഫ് ഭരണം പഴങ്കഥയാക്കിയ കേരളത്തിൽ നിന്നും രേവന്ത് റെഡ്ഡിക്കാണ് ഭരണനിർവ്വഹണത്തിന്റെ പാഠങ്ങൾ പഠിക്കാനുള്ളത്. ജനക്ഷേമ മാതൃകകളെക്കുറിച്ച് പഠിക്കാൻ തെലങ്കാന മുഖ്യമന്ത്രിയെ കേരളത്തിലേക്ക് സ്വാഗതം ചെയ്യുന്നു- മുഖ്യമന്ത്രി കുറിച്ചു.