ബിജെപിക്കെതിരായ കോൺഗ്രസ് അവിശ്വാസം തള്ളി; സിപിഎം പിന്തുണയിൽ സ്ഥാനം വേണ്ടെന്ന് ബിജെപിക്കാരിയായ വൈസ് പ്രസിഡന്‍റ്

തിരുവനന്തപുരം: ശബരിമല ഉൾപ്പടെയുള്ള വിഷയങ്ങളിൽ ജനങ്ങളുടെ എതിർപ്പ് നേരിടുന്ന സിപിഎമ്മിന്‍റെ പിന്തുണയോടെ അവിശ്വാസപ്രമേയം അതിജീവിക്കാൻ താൽപര്യമില്ലെന്ന് ബിജെപിക്കാരിയായ വൈസ് പ്രസിഡന്‍റ്. തിരുവനന്തപുരം വിളവൂർക്കൽ പഞ്ചായത്തിലാണ് നാടകീയരംഗങ്ങൾ അരങ്ങേറിയത്. ഇവിടെ ബിജെപി ഭരണസമിതിക്കെതിരെ കോൺഗ്രസ് കൊണ്ടുവന്ന അവിശ്വാസപ്രമേയം ഇടത് അംഗങ്ങൾ വിട്ടുനിന്നതോടെ പരാജയപ്പെടുകയായിരുന്നു. ഇതിന് പിന്നാലെയാണ് സിപിഎം സഹായത്തോടെ സ്ഥാനത്ത് തുടരാൻ താൽപര്യമില്ലെന്ന് വൈസ് പ്രസിഡന്‍റായിരുന്ന എസ്. ശാലിനി അറിയിക്കുകയായിരുന്നു. രാജിക്കത്ത് പഞ്ചായത്ത് സെക്രട്ടറിക്ക് കൈമാറുകയും ചെയ്തു.