ശങ്കരനാരായണൻ; പെൺമക്കളുള്ള മാതാപിതാക്കളുടെ ഹീറോ ആയി മാറിയ അച്ഛൻ; മകളെയോർത്ത് കണ്ണീരുണങ്ങാതെ മരണം വരെ

2001 ഫെബ്രുവരി 9. ആ വൈകുന്നേരമാണ് ശങ്കരനാരായണന്റെ ജീവിതം കീഴ്മേൽ മറിഞ്ഞത്. 13 വയസ് മാത്രം പ്രായമുള്ള മകൾ കൃഷ്ണപ്രിയ സ്കൂൾ വിട്ട് തിരിച്ചെത്തിയില്ല. പിന്നീട് നടത്തിയ തിരച്ചലിൽ അവളുടെ മുറിവേറ്റ് ചോരവാർന്ന മൃതദേഹം വഴിയിലുള്ള തോട്ടത്തിൽ കണ്ടെത്തി. തിരച്ചിലിന് കൂടെയുണ്ടായിരുന്നത് അയൽവാസിയായ മുഹമ്മദ് കോയ. കൊലയ്ക്ക് പിന്നിൽ പരിചയക്കാര്‍ ആരെങ്കിലുമാകാം എന്ന സംശയത്തിൽ പൊലീസിന്‍റെ അന്വേഷണം നീണ്ടു.

തിരച്ചിലിന് മുന്നിലുണ്ടായിരുന്ന അയൽവാസി മുഹമ്മദ് കോയ (24) പിന്നീട് മുങ്ങി. സ്ത്രീകളെ ഉപദ്രവിച്ചതും ഒളിഞ്ഞുനോട്ടത്തിനും ലഹരിക്കേസുകളിലും മറ്റും പ്രതിയായ കോയയെ പൊലീസ് പിടികൂടി. കൃഷ്ണപ്രിയയെ കൊന്ന് തള്ളുന്നതിനിടെ ഇയാൾ‌ കൈക്കലാക്കിയ ആഭരണവും കണ്ടെടുത്തു. വൈകാതെ പൊലീസ് അറസ്റ്റ് രേഖപ്പെടുത്തി.

Also Read- മകളെ ബലാത്സംഗം ചെയ്തു കൊലപ്പെടുത്തിയ പ്രതിയെ വെടിവെച്ചുകൊന്ന കേസിലെ പ്രതി ശങ്കരനാരായണൻ വിടവാങ്ങി

2002 ജൂലൈ 27ന് ആ നാട് കേട്ടുണർന്നത് മുഹമ്മദ് കോയയുടെ മരണവാർത്തായിരുന്നു. കൃഷ്ണപ്രിയയുടെ കൊലയാളി പൊട്ടക്കിണറ്റിൽ വെടിയേറ്റ് മരിച്ച നിലയിൽ. കൊന്നതാരെന്ന് പൊലീസിന് തെല്ലും സംശയമുണ്ടായിരുന്നില്ല. പൊലീസ് നേരെ ശങ്കരനാരായണനെ തേടി വീട്ടിലെത്തി. അറസ്റ്റ് ചെയ്തു. രണ്ട് സുഹൃത്തുക്കളുടെ സഹായത്തോടെ, തിര നിറച്ച തോക്ക് സംഘടിപ്പിച്ച് തക്കം നോക്കി മുഹമ്മദ് കോയയെ വെടിവച്ചു കൊല്ലുകയായിരുന്നുവെന്ന് പൊലീസിന് കീഴടങ്ങിയ ശങ്കരനാരായണൻ മൊഴി നൽകി. ക്ഷേത്രത്തിന് പുറകിൽ വച്ച് രണ്ട് തവണ വെടിയുതിർത്ത് കൊലപ്പെടുത്തിയ ശേഷം വീട്ടുപറമ്പിലെ പൊട്ടക്കിണറ്റിൽ തള്ളുകയായിരുന്നു. കൊലപ്പെടുത്താൻ ഉപയോഗിച്ച തോക്കും പൊലീസ് കണ്ടെടുത്തു. ജീവപര്യന്തം തടവാണ് മഞ്ചേരി അഡീഷണൽ സെഷൻസ് കോടതി ശങ്കരനാരായണന് വിധിച്ചത്. സഹായിച്ച രണ്ട് സുഹൃത്തുക്കൾക്ക് മൂന്നു മാസം വീതം തടവും വിധിച്ചു. ശങ്കരനാരായണനെ കണ്ണൂർ സെൻട്രൽ ജയിലിലേക്കയച്ചു.

'അവന്‍... മുഹമ്മദ് കോയ മരിക്കരുതായിരുന്നു... അവന്റെ രണ്ടുകാലും കയ്യും വെട്ടിയെടുക്കാനായിരുന്നു എന്റെ ആഗ്രഹം... പിന്നീടൊരിക്കലും അവനീ പണി ചെയ്യരുത്... വേദനിച്ച് നരകിച്ച് പുഴുവരിച്ച് അവന്‍ ചാകണമായിരുന്നു...'  ശങ്കരനാരായണന്‍ പറഞ്ഞു. മകളുടെ മരണവും ജയില്‍ വാസവും മോചനവും എല്ലാമായി പ്രക്ഷുബ്ധമായിരുന്നു ശങ്കരനാരായണന്റെ ജീവിതം. നാട്ടുകാര്‍ തന്നെ കുറ്റപ്പെടുത്തിയില്ലെന്നും പിന്തുണ തന്നുവെന്നും ശങ്കരനാരായണന്‍ പറഞ്ഞിരുന്നു. 'നാട്ടുകാരും മാധ്യമപ്രവര്‍ത്തകരും സുഹൃത്തുക്കളുമൊക്കെ ഒരുപാട് പിന്തുണ തന്നു. ആരും കുറ്റപ്പെടുത്തിയില്ല. '- ശങ്കരനാരായണൻ പറഞ്ഞു.