'ആ വാർത്ത തെറ്റ്'; CPM സംസ്ഥാന സമിതിയിൽ എം വി ഗോവിന്ദനെ വിമർശിച്ചിട്ടില്ലെന്ന് ജെയിംസ് മാത്യു എംഎൽഎ

ജെയിംസ് മാത്യുവിന്റെ വിശദീകരണ കുറിപ്പ് ഇങ്ങനെ- 'ഇന്നലെയും ഇന്നുമായി ചില ചാനലുകളിലും പത്രങ്ങളിലും വന്നുകൊണ്ടിരിക്കുന്ന വാർത്ത തീർത്തും അടിസ്ഥാന രഹിതമാണ്. സിപിഎം സംസ്ഥാന സമിതിയിൽ എം വി ഗോവിന്ദൻ മാസ്റ്റർക്കെതിരെ ഞാൻ വിമർശനം ഉന്നയിച്ചു എന്ന നിലയിലാണ് വാർത്ത വന്നുകൊണ്ടിരിക്കുന്നത്. ഇത്തരത്തിലുള്ള യാതൊരു പരാമർശവും ഉണ്ടായിട്ടില്ല എന്നുമാത്രമല്ല പൊതുസമൂഹത്തിനിടയിൽ തെറ്റിദ്ധാരണ സൃഷ്ടിക്കുന്നതിനും ആന്തൂരിലെ വ്യവസായിയുടെ ആത്മഹത്യയുമായി ബന്ധപ്പെട്ട വിഷയങ്ങളിൽ സിപിഎമ്മിനകത്ത് ഭിന്നതയുണ്ടെന്ന് വരുത്തിത്തീർക്കുന്നതിനും ബോധപൂർവം ചില മാധ്യമങ്ങൾ സൃഷ്ടിച്ച വാര്‍ത്തയാണിത്. ഇത് തീർത്തും വസ്തുതാവിരുദ്ധവും അടിസ്ഥാനരഹിതവുമാണെന്ന് ഈ വാർത്ത പ്രസിദ്ധീകരിച്ച മാധ്യമങ്ങൾ തിരുത്തി പ്രസിദ്ധീകരിക്കണമെന്ന് അഭ്യർത്ഥിക്കുന്നു.'