അങ്കമാലിക്കാരുടെ സ്വന്തം അങ്കമാലി മാങ്ങാക്കറി

പച്ച മാങ്ങ (3 എണ്ണം) കഴുകി തൊലികളഞ്ഞു വണ്ണം കുറച്ച് നീളത്തിൽ നുറുക്കി എടുക്കുക. കറി ഉണ്ടാക്കാൻ എടുക്കുന്ന പാത്രത്തിലേക്ക് പച്ചമുളക് (2 എണ്ണം), കനം കുറഞ്ഞു അരിഞ്ഞു വെച്ച സവാള (1എണ്ണം), ഇഞ്ചി (മീഡിയം), കറിവേപ്പില, 3 ടീസ്പൂൺ വെളിച്ചെണ്ണ, ഉപ്പ്, മഞ്ഞൾ പൊടി (1/2), മല്ലിപൊടി (2 ടീസ്പൂൺ), കാശ്മീരി മുളക് പൊടി (1/2), വിനാഗിരി (1 ടീസ്പൂൺ) ചേർത്ത് കൈ വച്ചു നന്നായി തിരുമ്മി യോജിപ്പിക്കുക. സവാളയിലെ നീര് നന്നായി ഇറങ്ങി വരണം. ശേഷം നേരത്തെ നുറുക്കി വെച്ച മാങ്ങ ഇതിലേക്ക് ചേർത്ത് എല്ലാം കൂടി യോജിപ്പിക്കുക. അതിലേക്ക് തേങ്ങയുടെ രണ്ടാം പാൽ (1 കപ്പ്) ചേർത്തിളക്കി അടുപ്പത്തു വയ്ക്കാം. ഒരേ ദിശയിലേക്ക് വേണം ഇളക്കി കൊടുക്കുവാൻ, അല്ലെങ്കിൽ മാങ്ങ ഉടഞ്ഞു പോവാൻ സാധ്യത ഉണ്ട്. മാങ്ങ വെന്തത്തിനു ശേഷം അതിലേക്ക് തേങ്ങയുടെ ഒന്നാം പാൽ ചേർത്തിളക്കി തിള വന്നു കഴിഞ്ഞാൽ തീ അണയ്ക്കുക. ഇനി ഒരു ഫ്രൈയിങ് പാൻ ചൂടാക്കി അതിലേക്കു വെളിച്ചെണ്ണ ഒഴിച്ച് കടുകും ചുവന്ന മുളകും പൊട്ടിച്ചു ഇടുക. ചെറിയ ഉള്ളി വട്ടത്തിൽ കനം കുറച്ച് അരിഞ്ഞതും കറിവേപ്പിലയും ചേർത്ത് വഴറ്റി കറിയിലേക്കു ചേർക്കുക.