ഗദ്ദിക 2025: ഗോത്രകലകളും പരമ്പരാഗത ഉൽപന്നങ്ങളും ജനപങ്കാളിത്തത്തോടെ അരങ്ങേറി

ഗോത്ര ജനവിഭാഗത്തിൻ്റെ തനത് കലകളും പരമ്പരാഗത ഉൽപന്നങ്ങളും സമൂഹത്തിന് മുന്നിൽ അവതരിപ്പിക്കുന്ന ഗദ്ദിക 2025 ജനപങ്കാളിത്തം കൊണ്ട് ശ്രദ്ധേയമായി. ഗദ്ദിക കാണാനും അതിൻ്റെ ഭാഗമാകാനും നിരവധി ആളുകളാണ് ഓരോ ദിനവും ജവഹർലാൽ നെഹ്റു അന്താരാഷ്ട്ര സ്റ്റേഡിയം ഗ്രൗണ്ടിലേക്ക് എത്തുന്നത്. രാവിലെ മുതൽ വൈകിട്ട് വരെ നീണ്ടുനിന്ന പരിപാടികളുടെ ഭാഗമാകാൻ പട്ടികജാതി പട്ടികവർഗ്ഗ പിന്നാക്ക വിഭാഗ ക്ഷേമ വകുപ്പ് മന്ത്രി ഒ ആർ കേളു എത്തിച്ചേർന്നത് വലിയ ആവേശമായി. ഉച്ചയോടെ ഗദ്ദിക വേദിയിലെത്തിയ മന്ത്രി വിവിധ സ്റ്റാളുകൾ സന്ദർശിക്കുകയും ജനങ്ങളുമായി സംവദിക്കുകയും ചെയ്തു.