നിലമ്പൂരിൽ എൽഡിഎഫിന് പി വി അൻവർ ഷോക്ക്; ചുങ്കത്തറ പഞ്ചായത്ത് ഭരണം നഷ്ടമായി; യുഡിഎഫ് അവിശ്വാസം പാസായി
- Published by:Rajesh V
- news18-malayalam
Last Updated:
ഇരുമുന്നണികള്ക്കും തുല്യശക്തിയായിരുന്ന ഭരണസമിതിയില് വൈസ് പ്രസിഡന്റ് നുസൈബ സുധീർ യുഡിഎഫിന് അനുകൂലമായി വോട്ട് ചെയ്യുകയായിരുന്നു. ഒമ്പതിനെതിരെ 11 വോട്ടുകൾക്കാണ് അവിശ്വാസപ്രമേയം പാസായത്
മലപ്പുറം: ചുങ്കത്തറ പഞ്ചായത്തില് എല്ഡിഎഫിന് ഭരണം നഷ്ടമായി. യുഡിഎഫ് കൊണ്ടുവന്ന അവിശ്വാസപ്രമേയം വിജയിച്ചു. ഇരുമുന്നണികള്ക്കും തുല്യശക്തിയായിരുന്ന ഭരണസമിതിയില് വൈസ് പ്രസിഡന്റ് നുസൈബ സുധീർ യുഡിഎഫിന് അനുകൂലമായി വോട്ട് ചെയ്യുകയായിരുന്നു. ഒമ്പതിനെതിരെ 11 വോട്ടുകൾക്കാണ് അവിശ്വാസപ്രമേയം പാസായത്. പി വി അന്വര് ഇടപെട്ടാണ് വൈസ് പ്രസിഡന്റായ നുസൈബ സുധീറിനെ കൂറുമാറ്റിയതെന്നാണ് സിപിഎമ്മിന്റെ ആരോപണം. പൊലീസ് സുരക്ഷയിലാണ് അവിശ്വാസപ്രമേയത്തില് വോട്ടെടുപ്പ് നടന്നത്.
അവിശ്വാസപ്രമേയത്തില് വോട്ടെടുപ്പ് നടക്കുന്നതിന് മുമ്പായി ചുങ്കത്തറയില് എല്ഡിഎഫ്- യുഡിഎഫ് പ്രവര്ത്തകര് തമ്മില് സംഘര്ഷമുണ്ടായിരുന്നു. ഇതേത്തുടര്ന്ന് പൊലീസ് ലാത്തിവീശി. പി വി അന്വര്, കോണ്ഗ്രസ് നേതാക്കളായ ആര്യാടന് ഷൗക്കത്ത്, വി എസ് ജോയ് എന്നിവര് ഉള്പ്പെടെയുള്ള നേതാക്കള് ഈ സമയം സ്ഥലത്തുണ്ടായിരുന്നു.
വൈസ് പ്രസിഡന്റ് നുസൈബ സുധീറിനെ കാണാനില്ലെന്ന് കഴിഞ്ഞദിവസം സിപിഎം നേതാക്കള് ആരോപിച്ചിരുന്നു. എന്നാല്, ഭാര്യ തന്റെ ഒപ്പമുണ്ടെന്നും കാണാനില്ലെന്ന വാര്ത്ത ശരിയല്ലെന്നുമാണ് ഭര്ത്താവും തൃണമൂല് കോണ്ഗ്രസ് നിലമ്പൂര് നിയോജകമണ്ഡലം ചെയര്മാനുമായ സുധീര് പുന്നപ്പാല പറഞ്ഞത്. അന്വറിന്റെ വിശ്വസ്തനാണ് സുധീര്.
advertisement
അവിശ്വാസത്തിന് നോട്ടീസ് നല്കിയതിന് തൊട്ടുപിന്നാലെ എല്ഡിഎഫ് വാർത്താസമ്മേളനം നടത്തി നുസൈബ സുധീര് ഉള്പ്പെടെ 10 അംഗങ്ങളെയും പങ്കെടുപ്പിച്ച് പ്രമേയം പരാജയപ്പെടുത്തുമെന്ന് പ്രഖ്യാപിച്ചിരുന്നു. അടുത്ത തിരഞ്ഞെടുപ്പില് യുഡിഎഫ് -തൃണമൂല് ടിക്കറ്റില് നുസൈബയ്ക്കോ സുധീറിനോ സീറ്റ് നല്കാന് അന്വറും കോണ്ഗ്രസ് നേതാക്കളും തമ്മില് ധാരണയായതായാണ് സൂചന.
യുഡിഎഫ് പ്രവേശനത്തിന് കാത്തുനില്ക്കുന്ന അന്വറിന് രാഷ്ട്രീയനേട്ടമായി മാറിയിരിക്കുകയാണ് ഈ ഭരണമാറ്റം. നേരത്തേ വയനാട് ജില്ലയിലെ പനമരം ഗ്രാമപഞ്ചായത്തില് എല്ഡിഎഫിനെ അട്ടിമറിച്ച് യുഡിഎഫ് ഭരണം പിടിച്ചിരുന്നു. ജെഡിഎസ് വിമതനായി മത്സരിച്ച് വിജയിച്ച ബെന്നി ചെറിയാന് യുഡിഎഫിന് വോട്ട് ചെയ്തതോടെയാണ് എല്ഡിഎഫിന് ഭരണം നഷ്ടമായത്. ബെന്നിയെ ജെഡിഎസ് പുറത്താക്കിയിരുന്നെങ്കിലും അദ്ദേഹം ഇടതുമുന്നണിയെയാണ് പിന്തുണച്ചിരുന്നത്.
advertisement
എന്നാല് പി വി അന്വര് തൃണമൂല് കോണ്ഗ്രസിന്റെ കേരളത്തിലെ കണ്വീനറായതിന് പിന്നാലെ ബെന്നി തൃണമൂലില് ചേരുകയായിരുന്നു. ഇതിന് ശേഷമാണ് അദ്ദേഹം യുഡിഎഫിനെ പിന്തുണച്ചത്.
Click here to add News18 as your preferred news source on Google. ഏറ്റവും പുതിയ വാർത്തകൾ, വിഡിയോകൾ, വിദഗ്ദാഭിപ്രായങ്ങൾ, രാഷ്ട്രീയം, ക്രൈം, തുടങ്ങി എല്ലാം ഇവിടെയുണ്ട്. ഏറ്റവും പുതിയ കേരളവാർത്തകൾക്കായി News18 മലയാളത്തിനൊപ്പം വരൂ
Location :
Nilambur,Malappuram,Kerala
First Published :
Feb 25, 2025 3:23 PM IST
മലയാളം വാർത്തകൾ/ വാർത്ത/Kerala/
നിലമ്പൂരിൽ എൽഡിഎഫിന് പി വി അൻവർ ഷോക്ക്; ചുങ്കത്തറ പഞ്ചായത്ത് ഭരണം നഷ്ടമായി; യുഡിഎഫ് അവിശ്വാസം പാസായി
