MM Mani| എംഎം മണിക്കെതിരായ അധിക്ഷേപം; ഖേദം പ്രകടിപ്പിച്ച് മഹിളാ കോൺഗ്രസ് ജില്ലാ നേതൃത്വം

ചിമ്പാൻസിയുടെ ചിത്രത്തിൽ എംഎം മണിയുടെ ഫോട്ടോ ഒട്ടിച്ചായിരുന്നു അധിക്ഷേപം. കെകെ രമയ്ക്കെതിരായ എം എം മണിയുടെ വിവാദ പരാമർശത്തിൽ പ്രതിഷേധിച്ച് മഹിള കോൺഗ്രസ് നടത്തിയ നിയമസഭാ മാർച്ചിലായിരുന്നു സംഭവം.

സംഭവം വിവാദമായതോടെ കോൺഗ്രസ് നേതൃത്വം നിർദേശം നൽകിയതിനെ തുടർന്നാണ് മഹിളാ കോൺഗ്രസ് ജില്ലാ നേതൃത്വം ഖേദപ്രകടനം നടത്തിയത്.

Also Read- ചിമ്പാൻസിയുടെ മുഖത്തിനു പകരം എംഎം മണിയുടെ മുഖം; ഇത് വെറൈറ്റി സമരമെന്ന് മഹിളാ കോൺഗ്രസ്

ആരെയും വ്യക്തിപരമായി ആക്ഷേപിക്കുന്നത് കോണ്‍ഗ്രസിന്റെയും യു.ഡി.എഫിന്റെയും രാഷ്ട്രീയ രീതിയല്ലെന്ന് പ്രസ്താവനയിൽ പറയുന്നു. മഹിളാ കോണ്‍ഗ്രസ് നേതൃത്വത്തിന്റെ തീരുമാന പ്രകാരമായിരുന്നില്ല ബോർഡ് എന്നും നിയമസഭാ മര്‍ച്ചിന് എത്തിയ പ്രവര്‍ത്തകരില്‍ ഒരാളാണ് ഈ ബോർഡ് കൊണ്ടു വന്നതെന്നുമാണ് വിശദീകരണം.

ബോർഡ് ശ്രദ്ധയില്‍പ്പെട്ടയുടനെ അത് മാറ്റാന്‍ നിര്‍ദ്ദേശിച്ചു. മഹിളാ കോണ്‍ഗ്രസ് ഉപയോഗിച്ച ബോർഡ് എം.എം മണിക്കോ അദ്ദേഹത്തെ സ്‌നേഹിക്കുന്നവര്‍ക്കോ വേദന ഉണ്ടാക്കിയിട്ടുണ്ടെങ്കില്‍ നിര്‍വ്യാജം ഖേദിക്കുന്നുവെന്നും പ്രസ്താവനയിൽ പറയുന്നു.

ബോർഡിനെതിരെ വ്യാപകമായി പ്രതിഷേധം ഉയർന്നതോടെ ന്യായീകരിച്ച് മഹിളാ കോൺഗ്രസ് പ്രവർത്തകർ രംഗത്തെത്തിയിരുന്നു. ഇത് വേറിട്ട സമരമെന്നായിരുന്നു വിശദീകരണം.