അഹിന്ദുക്കളെ ദേവസ്വം ബോർഡിൽ നിയമിക്കാൻ ഭേദഗതിയെന്ന് പ്രചരണം; കള്ള പ്രചരണമെന്ന് മന്ത്രി കടകംപള്ളി

തിരുവനന്തപുരം: അഹിന്ദുക്കളെ ദേവസ്വം ബോര്‍ഡിന്റെ ഉന്നത പദവികളില്‍ നിയമിക്കാന്‍ ട്രാവന്‍കൂര്‍ കൊച്ചിന്‍ ഹിന്ദു റിലിജിയസ് ആക്ട് ഭേദഗതി ചെയ്തുവെന്ന വാർത്ത അടിസ്ഥാനരഹിതമാണെന്ന് ദേവസ്വംവകുപ്പ് മന്ത്രി കടകംപള്ളി സുരേന്ദ്രൻ. ദേവസ്വം കമ്മീഷണറെ നിയമിക്കാനുള്ള അധികാരം ദേവസ്വം ബോർഡില്‍ നിന്ന് സര്‍ക്കാരില്‍ നിക്ഷിപ്തമാക്കുന്ന ഭേദഗതിയാണ് ഇപ്പോൾ വിവാദമാക്കിയിരിക്കുന്നത്. എന്നാൽ ഇത് തെറ്റായ പ്രചാരണമാണെന്ന് രേഖകൾ സഹിതം പുറത്തുവിട്ട് മന്ത്രി പറയുന്നത്. കമ്മീഷണറുടെ നിയമനം - സര്‍ക്കാരിന് ഗസറ്റ് വിജ്ഞാപനം വഴി, സര്‍ക്കാരിന്റെ അഡീഷണല്‍ സെക്രട്ടറിയുടെ പദവിയില്‍ കുറയാത്തതും, ഹിന്ദുവുമായതുമായ ഒരു ഉദ്യോഗസ്ഥനെ കമ്മീഷണറായി നിയമിക്കാവുന്നതാണ് എന്നാണ് പുതിയ വകുപ്പില്‍ പറയുന്നത്. എന്നാൽ ദേവസ്വം ബോർഡിന്‍റെ ഉന്നത പദവികളിൽ അഹിന്ദുക്കളെ നിയമിക്കാൻ ഭേദഗതി കൊണ്ടുവന്നുവെന്ന പ്രചരണമാണ് നടക്കുന്നതെന്നും മന്ത്രി പറഞ്ഞു.