'റോഡിലെ ചൂടിന്, സോഡാ നാരങ്ങ ബെസ്റ്റാ' ഗവര്‍ണറെ പരിഹസിച്ച് മന്ത്രി വി.ശിവന്‍കുട്ടി

എസ്എഫ്‌ഐ പ്രവര്‍ത്തകരുടെ കരിങ്കൊടി പ്രതിഷേധത്തിന് പിന്നാലെ റോഡിലിരുന്ന് പ്രതിഷേധിച്ച ഗവര്‍ണര്‍ ആരിഫ് മുഹമ്മദ് ഖാനെ പരിഹസിച്ച് മന്ത്രി വി ശിവന്‍കുട്ടിയുടെ ഫേസ്ബുക്ക് പോസ്റ്റ്. നാരങ്ങാവെള്ളത്തിന്‍റെ ചിത്രത്തിനൊപ്പം 'റോഡിലെ ചൂടിന് സോഡാ നാരങ്ങാ ബെസ്റ്റാ' എന്ന് കുറിച്ചുകൊണ്ടാണ് മന്ത്രി ഗവര്‍ണറെ പരിഹസിച്ചത്. ഗവര്‍ണറുടെ പ്രതിഷേധത്തെ 'ഷോ' എന്നാണ് മന്ത്രി വിശേഷിപ്പിച്ചത്. "ഗവർണറുടേത് നാലാമത്തെ ഷോ ആണ്. തന്റെ പദവി പോലും നോക്കാതെയുള്ള പ്രകടനമാണ് നടത്തുന്നത്. കേരളത്തെ വെല്ലുവിളിക്കുകയാണ് അദ്ദേഹം’’–മന്ത്രി വി.ശിവൻകുട്ടി പറഞ്ഞു.