ഇന്ത്യാക്കാർ ഏറെ ആത്മവിശ്വാസമുള്ളവരായി; ലോകത്തെവിടെയും ഇന്ത്യൻ പൗരന്റെ സുരക്ഷിതത്വമാണ് മോദിയുടെ ഗ്യാരന്റി: മന്ത്രി ജയശങ്കർ

കഴിഞ്ഞ പത്തു വർഷം മോദിസർക്കാർ മികച്ച പ്രവർത്തനമാണ് കാഴ്ചവച്ചതെന്ന് വിദേശകാര്യമന്ത്രി എസ് ജയശങ്കർ. ലോക സമ്പദ് വ്യവസ്ഥയിൽ ഇന്ത്യയെ അഞ്ചാം സ്ഥാനത്ത് എത്തിക്കാൻ മോദിസർക്കാരിന് കഴിഞ്ഞു. കോവിഡ് പ്രശ്നത്തിനും യുക്രെയ്ൻ യുദ്ധത്തിലും ഇന്ധന വിലവർധനവിലും മിഡിൽ ഈസ്റ്റ് പ്രശ്നങ്ങളിലും ഇന്ത്യയെ ധീരമായി മുന്നോട്ടു നയിക്കാൻ മോദി സർക്കാരിന് കഴിഞ്ഞു. അടുത്ത 25 വർഷം മുന്നിൽകണ്ടാണ് ബിജെപിയും നരേന്ദ്ര മോദിയും മുന്നോട്ട് പോകുന്നത്. കഴിഞ്ഞ പത്ത് വർഷം കൊണ്ട് ഗൾഫ് രാജ്യങ്ങളുമായി നല്ല ബന്ധമാണ് ഇന്ത്യക്ക് ഉള്ളത്. പ്രത്യേകിച്ചും യുഎഇയുമായി. ഇന്ദിരാ ഗാന്ധിക്ക് ശേഷം ഗൾഫ് രാജ്യങ്ങൾ സന്ദർശിക്കുകയും അവരുമായി ഊഷ്മള ബന്ധം ഊട്ടിയുറപ്പിക്കുകയും ചെയ്ത പ്രധാനമന്ത്രി നരേന്ദ്രമോദിയാണ്. 30 വർഷത്തെ ഇടവേളയെ തുടർന്ന് ഉണ്ടായ വിടവ് നികത്തിയത് നരേന്ദ്രമോദിയാണ്. യുഎഇ , സൗദി, ഖത്തർ, ബഹറൈൻ തുടങ്ങിയ രാജ്യങ്ങളുമായി ഇന്ന് ഇന്ത്യക്ക് നല്ല ബന്ധമാണ് ഉള്ളത്.