കാസർഗോഡ് ഒമ്പതാം ക്ലാസ് വിദ്യാർത്ഥി ഓടിച്ച ബൈക്ക് ഇടിച്ച് വഴിയാത്രക്കാരൻ മരിച്ചു

ബസ് സ്റ്റാൻഡിൽ നിന്ന് റോഡ് മുറിച്ച് കടക്കുകയായിരുന്ന അബ്ദുല്ലയെ വിദ്യാർത്ഥി ഓടിച്ച വാഹനം ഇടിക്കുകയായിരുന്നു. ബൈക്ക് അമിത വേഗതയിലായിരുന്നുവെന്ന് ദൃക്സാക്ഷികൾ പറഞ്ഞു. ഗുരുതരമായി പരിക്കേറ്റ അബ്ദുല്ലയെ ഉടൻ തന്നെ കുമ്പള സഹകരണ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം പോസ്റ്റ് മോർട്ടത്തിനായി കാസർഗോഡ് ജനറൽ ആശുപത്രി മോർച്ചറിയിലേക്ക് മാറ്റും.

അംഗടിമൊഗറിലെ പൗര പ്രമുഖനായിരുന്ന പരേതനായ ഹമീദ് ഹാജിയുടെ മകനാണ് അബ്ദുല്ല കുഞ്ഞി. ഭാര്യ: സഫിയ. മക്കൾ: ഷംസുദ്ദീൻ, ഷാഹുൽ ഹമീദ് (ഇരുവരും ഗൾഫ്), ഫൈസൽ. സഹോദരങ്ങൾ: റഫീഖ്, സിദ്ദീഖ്, ഉമർ, നഫീസ, ആയിഷ. സിപിഎം കുമ്പള ഏരിയ സെക്രടറി സി എ സുബൈർ മരിച്ച അബ്ദുല്ല കുഞ്ഞിയുടെ ഭാര്യ സഹോദരനാണ്. രണ്ട് വിദ്യാർഥികളാണ് അപകടം വരുത്തിയ ബൈകിൽ ഉണ്ടായിരുന്നത്. ബൈക്ക് ഓടിച്ച വിദ്യാർഥിയെ പൊലീസ് കസ്റ്റഡിയിലെടുത്തിട്ടുണ്ട്.