'യുഡി എഫ് ജയിച്ചാൽ മെസ്സിയെയും റൊണാൾഡോയെയും കേരളത്തിലെത്തിക്കും'; രേവന്ത് റെഡ്ഡിയുടെ ഗ്യാരണ്ടി

ഒരു വർഷത്തിനുള്ളിൽ ലോക ഫുട്ബോൾ ഇതിഹാസങ്ങളായ ലയണൽ മെസ്സിയെയോ ക്രിസ്റ്റ്യാനോ റൊണാൾഡോയെയോ കേരളത്തിൽ എത്തിക്കുമെന്നായിരുന്നു അദ്ദേഹത്തിന്റെ വാഗ്ദാനം. കേരളത്തിലെ യുവാക്കൾക്ക് ഇവർക്കൊപ്പം ഫുട്ബോൾ കളിക്കാൻ അവസരമൊരുക്കുമെന്നും ഇത് തന്റെ 'ആറാം ഗ്യാരണ്ടി' ആണെന്നും അദ്ദേഹം പ്രഖ്യാപിച്ചു. മാവേലിക്കരയിലെ യുഡിഎഫ് സ്ഥാനാർഥിയുടെ തിരഞ്ഞെടുപ്പ് പ്രചാരണത്തിന്റെ ഭാഗമായി നടന്ന റോഡ്ഷോയ്ക്കിടെയാണ് അദ്ദേഹം ഇക്കാര്യ പറഞ്ഞത്.

നേരത്തെ മെസ്സിയെ തെലങ്കാനയിൽ എത്തിക്കാൻ താൻ ശ്രമിച്ചിരുന്നുവെന്നും എന്നാൽ അത് നടന്നില്ലെന്നും സൂചിപ്പിച്ച അദ്ദേഹം, ഇത്തവണ കേരളത്തിനായി അത് സാധ്യമാക്കുമെന്ന് ഉറപ്പുനൽകി. യുഡിഎഫ് പ്രവർത്തകരുടെ വലിയ പങ്കാളിത്തത്തോടെ നടന്ന റോഡ് ഷോയിൽ ഉടനീളം ആവേശകരമായ സ്വീകരണമാണ് തെലങ്കാന മുഖ്യമന്ത്രിക്ക് ലഭിച്ചത്.

പ്രസംഗത്തിനിടെ "ബൈ ബൈ പിണറായി" എന്ന മുദ്രാവാക്യം വിളിക്കാൻ രേവന്ത് റെഡ്ഡി ജനക്കൂട്ടത്തോട് ആവശ്യപ്പെട്ടു. ഈ ശബ്ദം പിണറായി വിജയൻ കേൾക്കണമെന്നും അദ്ദേഹം പറഞ്ഞു. എൽഡിഎഫ് സർക്കാർ ഈ തിരഞ്ഞെടുപ്പോടെ അവസാനിക്കുമെന്നും യുഡിഎഫ് അധികാരത്തിൽ വരുമെന്നുമാണ് രേവന്ത് റെഡ്ഡി ഈ മുദ്രാവാക്യത്തിലൂടെ അർത്ഥമാക്കുന്നത്.