യുഡിഎഫ്: നേട്ടമുണ്ടായത് ലീഗിനും വെല്‍ഫെയര്‍ പാര്‍ട്ടിക്കും മാത്രം; മധ്യകേരളത്തിലെ യുഡിഎഫ് വോട്ടുചോര്‍ച്ചക്ക് വെല്‍ഫെയര്‍ ബന്ധവും കാരണം

മധ്യകേരളത്തിലും തെക്കും യു ഡി എഫ് വോട്ടുകള്‍ ചോരാന്‍ കാരണമായത് വെല്‍ഫെയര്‍ ബന്ധമാണെന്ന വിമര്‍ശനം കോണ്‍ഗ്രസിനുള്ളില്‍ ഉയര്‍ന്നു കഴിഞ്ഞു. വെല്‍ഫെയര്‍ ബന്ധം വിവാദമാക്കിയത് കോണ്‍ഗ്രസ് നേതാക്കളാണെന്ന മറുവാദവും യു ഡി എഫില്‍ ഉയരുന്നുണ്ട്.

തിരിച്ച് വെല്‍ഫെയര്‍ പാര്‍ട്ടിക്കും അംഗബലം കൂടി. നാല്‍പ്പത്തിരണ്ട് ആയിരുന്ന അംഗബലം 65 ആയി ഉയര്‍ന്നു. പക്ഷേ, കോണ്‍ഗ്രസിനും മുന്നണിക്കും വലിയ നഷ്ടമുണ്ടായി. വലിയ തിരിച്ചടിയേറ്റത് മധ്യ കേരളത്തില്‍. ജോസ് കെ മാണിയുടെ മുന്നണി ബന്ധം മാത്രമല്ല ഇവിടെ യു ഡി എഫിന് തിരിച്ചടിയായത്.

കോണ്‍ഗ്രസിന്റെയും പി ജെ ജോസഫിന്റെയും ശക്തി കേന്ദ്രങ്ങളായ ചങ്ങനാശ്ശേരി, ഏറ്റുമാനൂര്‍, പത്തനംതിട്ട, പുതുപ്പള്ളി, തൊടുപുഴ, കോട്ടയം നഗരസഭ എന്നിവിടങ്ങളിലെല്ലാം വോട്ടു ചോര്‍ന്നു. യു ഡി എഫ് മതരാഷ്ട്രവാദികള്‍ക്കൊപ്പമെന്ന് ഇവിടെ ശക്തമായ പ്രചാരണം നടന്നു. അതേസമയം, ചില മറുവാദങ്ങളും ഉയരുന്നുണ്ട്.

വെല്‍ഫെയര്‍ ബന്ധം വിവാദമാക്കി വോട്ടര്‍മാരില്‍ ആശയക്കുഴപ്പം ഉണ്ടാക്കുന്നതിന് കോണ്‍ഗ്രസ് നേതാക്കളുടെ പരസ്യ പ്രസ്താവനകള്‍ വഴിയൊരുക്കിയെന്ന വിമര്‍ശനം ചില യു ഡി എഫ് നേതാക്കള്‍ ഉയര്‍ത്തുന്നു.

വെല്‍ഫെയർ പാര്‍ട്ടി യു ഡി എഫ് ബന്ധത്തിന് വഴി വെട്ടിയത് മുസ്ലിംലീഗ് നേതാവ് പി കെ കുഞ്ഞാലിക്കുട്ടിയാണ്. അത് പിന്നീട് കോണ്‍ഗ്രസിന്റെ ബാധ്യതയായി.

മലബാറിലും പല തദ്ദേശ സ്ഥാപനങ്ങളിലും യു ഡി എഫിന് ഭരണനഷ്ടമുണ്ടാക്കാന്‍ വെല്‍ഫെയര്‍ ബന്ധം വഴിയൊരുക്കിയെന്ന് കണക്കുകള്‍ പറയുന്നു. വെല്‍ഫെയര്‍ പാര്‍ട്ടി ശക്തികേന്ദ്രമായ മുക്കത്ത് നഗരസഭാ ഭരണം പിടിക്കാമെന്ന് യു ഡി എഫ് മോഹിച്ചെങ്കിലും അതും നടന്നില്ല. പരമ്പരാഗത വോട്ടുബാങ്കുകളിൽ ഉണ്ടായ വലിയ നഷ്ടം, മുസ്ലിം സംഘടനകളുടെ കടുത്ത എതിര്‍പ്പ്, ഇവയെല്ലാം മറികടന്ന് യു ഡി എഫ് വെല്‍ഫെയര്‍ പാര്‍ട്ടി ബന്ധം തുടരുമോയെന്ന് കാത്തിരുന്ന് കാണണം.