തമിഴ്‌നാടിനെയും കർണാടകയെയും ആശ്രയിക്കാതെ ഓണപ്പൂക്കൾ കൃഷി ചെയ്യാൻ ഒരുങ്ങി കാട്ടാക്കട

മാസങ്ങൾക്കപ്പുറം വീണ്ടുമൊരു ഓണക്കാലം നമ്മെ കാത്തിരിക്കുന്നു. ഭൂമിയിൽ ഉറങ്ങിക്കിടന്ന പുൽനാമ്പുകളിൽ പൂമൊട്ടുകൾ വിടരുന്നതോടെ വീണ്ടുമൊരു ഓണക്കാലം എത്തിയെന്ന് പ്രകൃതി മന്ത്രിക്കും. ചിങ്ങം പിറക്കുന്നതിനും മുൻപേ ചേറു മണ്ണിൽ  പുഷ്പകൃഷിയുടെ പുത്തൻ പാഠങ്ങൾ പകർന്നു നൽകാൻ ഒരുങ്ങുകയാണ് കാട്ടാക്കട. കാട്ടാക്കടയിലെ വിവിധ ഗ്രാമപഞ്ചായത്തുകളിൽ പുഷ്പകൃഷിക്ക് തുടക്കമായി. മാറാനല്ലൂർ ക്രൈസ് കോളേജ് ഗ്രൗണ്ടിൽ ഗ്രാമപഞ്ചായത്തിൻ്റെ നേതൃത്വത്തിൽ പുഷ്പ കൃഷിക്ക് തുടക്കമായി. പള്ളിച്ചൽ ഗ്രാമപഞ്ചായത്തിൽ മാത്രം 25 ഏക്കർ സ്ഥലത്താണ് പുഷ്പകൃഷിക്ക് ഇത്തവണ ആരംഭമാകുന്നത്. മറ്റിടങ്ങളിൽ നിന്നുള്ള പൂക്കളെ ആശ്രയിക്കുന്ന പതിവ് രീതി കേരളം പൊളിച്ചെഴുതുകയാണ്.