'പിണറായിക്കെതിരെ വധശ്രമത്തിന് കേസെടുക്കണം; മുഖ്യമന്ത്രിയും സുധാകരനും ഗുണ്ടകളാണെന്ന് ഏറ്റുപറഞ്ഞു': വി മുരളീധരൻ

തിരുവനന്തപുരം: മുഖ്യമന്ത്രി പിണറായി വിജയനും കെപിസിസി പ്രസിഡന്റ് കെ സുധാകരനും തമ്മിലുള്ള വാദപ്രതിവാദത്തിനെതിരെ വിമർശനവുമായി കേന്ദ്ര സഹ മന്ത്രി വി മുരളീധരൻ. പിണറായിക്കെതിരെ വധ ശ്രമത്തിന് കേസെടുക്കണമെന്ന്  മുരളീധരൻ ഫേസ്ബുക്കിൽ കുറിച്ചു. കെ സുധാകരന്റെ വാർത്താ സമ്മേളനത്തിൽ പിണറായി വിജയൻ വെട്ടിയെന്ന കണ്ടോത്ത് ഗോപി വെളിപ്പെടുത്തിയിരുന്നു. ഈ വെളിപ്പെടുത്തലിന്റെ അടിസ്ഥാനത്തിൽ കേസെടുക്കണമെന്നാണ് മുരളീധരൻ ആവശ്യപ്പെട്ടിരിക്കുന്നത്. ഇന്നലെയും ഇന്നുമായി നടത്തിയ വാര്‍ത്താ സമ്മേളനങ്ങളിലൂടെ കേരളത്തിന്‍റെ മുഖ്യമന്ത്രിയും കോൺഗ്രസ് പ്രസിഡൻറും തങ്ങള്‍ ഇരുവരും അടിസ്ഥാനപരമായി ഗൂണ്ടകളും ക്രിമിനലുകളുമാണെന്ന് കേരളത്തോട് ഏറ്റു പറഞ്ഞെന്നും മുരളീധരൻ ചൂണ്ടിക്കാട്ടി.