'മലയാളികള്‍ക്ക് ഈഗോ; സംസ്ഥാനത്തിന്‍റെ വികസനത്തിന് അതിഥി തൊഴിലാളികള്‍ നല്‍കുന്ന സംഭാവന വലുത്'; ഹൈക്കോടതി

എറണാകുളം നെട്ടൂരിലെ മൊത്തവ്യാപാര മേഖലയിൽനിന്ന് അതിഥിത്തൊഴിലാളികളെ കുടിയൊഴിപ്പിക്കുന്നതുമായി ബന്ധപ്പെട്ട ഹർജി പരിഗണിക്കവെയാണ് ഹൈക്കോടതി ഇക്കാര്യം വാക്കാൽ പരാമര്‍ശിച്ചത്. കഠിനാധ്വാനത്തിന് മലയാളികൾ തയ്യാറാകാതെ വന്നതാണ് അതിഥിത്തൊഴിലാളികളുടെ വരവിന് കാരണമായതെന്നും കോടതി പറഞ്ഞു.

നെട്ടൂരിലെ മാർക്കറ്റിൽ അതിഥിത്തൊഴിലാളികൾക്ക്  താമസിക്കാനും ഭക്ഷണം പാകം ചെയ്യാനുമുള്ള സൗകര്യം വ്യാപാരികള്‍ നല്‍കിയിരുന്നു. എന്നാൽ, ഇവരില്‍ ചിലരുടെ ലഹരിമരുന്ന് ഉപയോഗം മറ്റ് തൊഴിലാളികൾക്ക് ബുദ്ധിമുട്ടുണ്ടാക്കുന്നു എന്ന് ആരോപിച്ചാണ് ഹർജിക്കാർ ഹൈക്കോടതിയെ സമീപിച്ചത്. ഹർജിയിൽ ജില്ലാ കളക്ടർ അന്വേഷണം നടത്തി റിപ്പോർട്ട്‌ നൽകാൻ കോടി നിർദേശം നല്‍കിയിട്ടുണ്ട്. ഹർജിയിലെ ആരോപണങ്ങൾ ഗൗരവമുള്ളതാണെന്ന് കോടതി നിരീക്ഷിച്ചു. ഒരു മാസത്തിനുശേഷം ഹർജി വീണ്ടും പരിഗണിക്കും.