Health Tips | നിങ്ങളുടെ ആരോ​ഗ്യത്തെ ദോഷകരമായി ബാധിക്കുന്ന ചില ശീലങ്ങൾ

ആരോഗ്യകരമായ ഒരു ജീവിതത്തിന് ഏറ്റവും പ്രധാനമാണ് ശരിയായ ഉറക്കം ലഭിക്കുക എന്നത്. മുതിർന്ന ഒരാൾക്ക് എല്ലാ ദിവസവും 6 മുതൽ 8 മണിക്കൂർ വരെ നല്ല ഉറക്കം ആവശ്യമാണ്. ഉറക്കക്കുറവ് മാനസികാവസ്ഥയെ പോലും ബാധിച്ചേക്കാം. കോപം, ശ്രദ്ധ കേന്ദ്രീകരിക്കാനുള്ള ബുദ്ധിമുട്ട്, ഓർമക്കുറവ് തുടങ്ങിയവയും മതിയായ ഉറക്കം ലഭിക്കാത്തു മൂലം പലരിലും കാണപ്പെടുന്ന പ്രശ്നങ്ങളാണ്. അമിതവണ്ണം, പ്രമേഹം, ഹൃദ്രോഗം തുടങ്ങിയ ശാരീരിക പ്രശ്നങ്ങൾക്കും ഇത് കാരണമാകുന്നു. ഉറക്കക്കുറവ് മൂലം സ്തനങ്ങൾ, അണ്ഡാശയങ്ങൾ, പ്രോസ്റ്റേറ്റ്, വൻകുടൽ എന്നിവയിൽ കാൻസറുകൾ ഉണ്ടാകാനുള്ള സാധ്യതയും വർദ്ധിക്കും.

നിങ്ങളുടെ ശരീരത്തിന് തീരെ ആവശ്യം ഇല്ലാത്ത ഒരു പദാർത്ഥമാണ് പുകയില. പുകവലിക്കുന്ന ആളുകളെപ്പോലെ തന്നെ അത് ശ്വസിക്കുന്ന ആളുകളിലും അപകട സാധ്യത വളരെ വലുതാണ്. ഒട്ടേറെ ഗുരുതരമായ ആരോഗ്യപ്രശ്‌നങ്ങളുണ്ടാക്കുന്ന ഒരു ദുശീലമാണ് പുകവലിയും പുകയിലയുടെ ഉപയോ​ഗവും. യുവാക്കളില്‍ ഹൃദയാഘാതത്തിനുള്ള പ്രധാന കാരണം പുകവലിയാണ്. വല്ലപ്പോഴുമുള്ള പുകവലി പോലും അപകടകരമാണ്. അതിനാൽ പുകവലി, പുകയില ചവയ്ക്കൽ, സ്നഫ്, ഹുക്ക തുടങ്ങിയ മറ്റേതെങ്കിലും രൂപത്തിൽ പുകയില ശരീരത്തിലെത്തുന്നത് എന്നിവയെല്ലാം കർശനമായി ഒഴിവാക്കണം. നിങ്ങൾ പുകവലി എന്ന ദുശീലം ഉള്ളവർ ആണെങ്കിൽ അത് അവസാനിപ്പിക്കാൻ സാധ്യമായതെല്ലാം ചെയ്യുക. ആവശ്യമെങ്കിൽ ഇതിനായി പ്രൊഫഷണൽ സഹായം തേടുക, കൗൺസിലിംഗിനും ജീവിതശൈലിയിലെ മാറ്റങ്ങൾക്കും പുറമെ, മരുന്നുകളിലൂടെയും ഡി-അഡിക്ഷൻ തെറാപ്പിയിലൂടെയും ഇതിനായി നിങ്ങളെ സഹായിക്കുന്ന സ്പെഷ്യലിസ്റ്റുകളുണ്ട്.

പലരും അധികം കാര്യമാക്കാത്ത ഒരു ദുശീലമാണ് മോശം ഭക്ഷണ ശീലങ്ങൾ. സംസ്കരിച്ച ഭക്ഷണം കഴിക്കൽ, അമിതമായി ഭക്ഷണം കഴിക്കൽ, ക്രമരഹിതമായ ഭക്ഷണരീതികൾ, അർദ്ധരാത്രിയുള്ള ഭക്ഷണം കഴിക്കൽ, അമിതമായ കലോറി ഉപഭോഗം തുടങ്ങിയവ എല്ലാം ശരീരത്തെ ദോഷകരമായി ബാധിക്കും. പൊണ്ണത്തടി, പ്രമേഹം, രക്തസമ്മർദ്ദം, ഹൃദ്രോഗം തുടങ്ങിയ പല രോഗങ്ങൾക്കും കാരണമാകുന്നതിനു പുറമേ, ഇത്തരം ശീലങ്ങൾ ചില അർബുദങ്ങൾ ഉണ്ടാകാനുള്ള സാധ്യതയും വർദ്ധിപ്പിക്കുന്നു.

വല്ലപ്പോഴും മിതമായ രീതിയിൽ മദ്യപിക്കുന്നത് ഹാനികരമാകില്ല എന്നു നമുക്കറിയാം. എന്നാൽ വളരെ കുറഞ്ഞ അളവിലാണെങ്കിൽ പോലും സ്ഥിരമായി മദ്യം കഴിക്കുന്നവരാണെങ്കിൽ ആരോ​ഗ്യത്തെ അത് ദോഷകരമായി ബാധിക്കും. അമിതമായി മദ്യപിക്കുന്നത് രോഗപ്രതിരോധ ശേഷിയെ ദുര്‍ബലപ്പെടുത്തുകയും അസുഖങ്ങൾ വരാനുള്ള സാധ്യത വര്‍ദ്ധിപ്പിക്കുകയും ചെയ്യും. അമിതമായി മദ്യപിക്കുന്നവരില്‍ കരള്‍ രോഗങ്ങൾ വരാനുള്ള സാധ്യതയും ഉണ്ട്. അമിതമായി മദ്യം കഴിക്കുന്നവരിലെ ഏറ്റവും ​ഗുരുതരമായ പാര്‍ശ്വഫലങ്ങളിലൊന്ന് ബുദ്ധിശക്തി കുറയുന്നതും തലച്ചോറിന്റെ സങ്കോചവും. മദ്യപാനവുമായി ബന്ധപ്പെട്ട ആരോഗ്യ അപകടങ്ങളില്‍ ഡിമെന്‍ഷ്യയും ഉണ്ട്. സ്ഥിരമായി അമിത അളവില്‍ മദ്യപിക്കുന്നവരുടെ ആയുര്‍ദൈര്‍ഘ്യം കുറയുമെന്നും പഠനങ്ങൾ സൂചിപ്പിക്കുന്നു. അമിതമായി മദ്യം കഴിക്കുന്നത് പലപ്പോഴും ഹൈപ്പർടെൻഷനും (ഉയർന്ന രക്തസമ്മർദ്ദം) കാരണമാകുന്നു, ഇത് ഹൃദയാരോ​ഗ്യത്തെയും ബാധിക്കും.

ഡെസ്ക് ജോലികൾ ചെയ്യുന്നവർ, ടിവി അല്ലെങ്കിൽ ഗാഡ്‌ജെറ്റുകൾക്ക് മുന്നിൽ ഒരുപാടു നേരം ഇരിക്കുന്നവർ എന്നിവരും ഈ ശീലം മാറ്റണം. ദീർഘനേരം ഒറ്റ ഇരിപ്പിൽ ജോലി ചെയ്യുന്നത് പല ആരോഗ്യപ്രശ്നങ്ങൾക്കും കാരണമാകാം. ഇതിന്റെ അനന്തര ഫലമായി, കഴുത്തുവേദന, നടുവേദന, തോൾവേദന തുടങ്ങിയ രോ​ഗങ്ങളും അസ്ഥി സംബന്ധമായ പ്രശ്നങ്ങൾ, പേശി സംബന്ധമായ പ്രശ്നങ്ങൾ എന്നിവയെല്ലാം ഉണ്ടാകാം.