ഇന്ത്യയുടെ സംസ്കാരവും പൈതൃകവും അറിഞ്ഞൊരു യാത്ര; ഭാരത് ഗൗരവ് ടൂർ പാക്കേജിനെക്കുറിച്ച് അറിയേണ്ടതെല്ലാം

രണ്ട് ഫൈൻ ഡൈനിംഗ് റെസ്‌റ്റോറന്റുകൾ, ഒരു മിനി ലൈബ്രറി, കോച്ചുകളിലെ ഷവർ ക്യുബിക്കിളുകൾ തുടങ്ങിയ സേവനങ്ങൾ ഉൾപ്പെടുന്ന പാക്കേജിന് എസി സെക്കന്റ് ക്ലാസിന് ഒരാൾക്ക് 1.06 ലക്ഷം രൂപയാണ് ചെലവ്. ഇന്ത്യൻ റെയിൽവേ പ്രഖ്യാപിച്ച തീം അടിസ്ഥാനമാക്കിയുള്ള ഭാരത് ഗൗരവ് ട്രെയിനുകൾക്ക് കീഴിലുള്ള ഏറ്റവും പുതിയ പാക്കേജാണിത്.

ഭാരത് ഗൗരവ് ട്രെയിനുകളിലെ ടൂർ പാക്കേജിൽ ഓഫ് ബോർഡ് യാത്രകൾ, ബസുകളിലെ ഉല്ലാസയാത്രകൾ, ഹോട്ടൽ സ്റ്റേകൾ, ടൂർ ഗൈഡുകൾ, ഭക്ഷണം, യാത്രാ ഇൻഷുറൻസ് തുടങ്ങിയ സേവനങ്ങളും ഡോക്ടർ ഓൺ-ബോർഡ് പോലെയുള്ള അനുബന്ധ ഓൺബോർഡ് സേവനങ്ങളും ഉൾപ്പെടുന്നു. യാത്ര ആരംഭിക്കുന്ന സ്റ്റേഷനുകളിൽ തന്നെയാണ് അവസാനിക്കുന്നതും. ഇതിനിടെ, വിവിധ ഓൺബോർഡിംഗ്, ഡീബോർഡിംഗ് സ്റ്റേഷനുകളും ഉണ്ടാകും.

ഭാരത് ഗൗരവ് ടൂർ പ​ദ്ധതിക്കു കീഴിൽ ടൂർ ഓപ്പറേറ്റർമാർക്കും സംസ്ഥാന സർക്കാരുകൾക്കും സ്വകാര്യ കമ്പനികൾക്കും ഇന്ത്യൻ റെയിൽവേയിൽ നിന്ന് ട്രെയിനുകൾ വാടകക്ക് വാങ്ങാനും ഏത് സർക്യൂട്ടിലും പ്രവർത്തിപ്പിക്കാനും കഴിയും. യാത്ര, റൂട്ട്, താരിഫ് എന്നിവ തീരുമാനിക്കാനുള്ള അവകാശം സ്വകാര്യ കമ്പനികൾക്ക് ഉണ്ടായിരിക്കും. ഉദാഹരണത്തിന്, ഇന്ത്യൻ റെയിൽവേയുടെ സഹകരണത്തോടെ കർണാടക സർക്കാർ കാശി, പുരി, ദ്വാരക എന്നിവ ഉൾപ്പെടുന്ന ‘കർണാടക ഭാരത് ഗൗരവ് കാശി ദർശൻ’ എന്ന ടൂർ പാക്കേജ് ആരംഭിച്ചിരുന്നു. എട്ട് ദിവസത്തെ റൗണ്ട് ട്രിപ്പിന് 15,000 മുതലാണ് പാക്കേജ്. ‘കർണാടക ഭാരത് ഗൗരവ് കാശി ദർശൻ’ പദ്ധതിക്കു കീഴിലുള്ള അടുത്ത ടൂർ പാക്കേജ് ഏപ്രിൽ 14 മുതൽ ഏപ്രിൽ 28 വരെയാണ്.