മാട്രിമോണിയല്‍ സൈറ്റില്‍ പങ്കാളിയെ തിരഞ്ഞ യുവാവിന് നഷ്ടമായത് 44 ലക്ഷം രൂപ

മാട്രിമോണിയല്‍ സൈറ്റില്‍ പരിചയപ്പെട്ട പെണ്‍കുട്ടിയുമായി സംസാരിച്ച ബെംഗളൂരു സ്വദേശിയായ യുവാവ് സൈബര്‍ തട്ടിപ്പിന് ഇരയായി. പടിഞ്ഞാറന്‍ ബെംഗളൂരു സ്വദേശിയായ യുവാവിന് 44 ലക്ഷം രൂപ നഷ്ടപ്പെട്ടതായി പോലീസ് അറിയിച്ചു. മാട്രിമോണിയല്‍ സൈറ്റില്‍ അര്‍ച്ചന എന്ന പെണ്‍കുട്ടിക്ക് യുവാവ് റിക്വസ്റ്റ് അയച്ചിരുന്നു. വൈകാതെ തന്നെ അര്‍ച്ചന യുവാവിന്റെ റിക്വസ്റ്റ് സ്വീകരിക്കുകയും വാട്ട്‌സ്ആപ്പിലൂടെ സംസാരിക്കാന്‍ തുടങ്ങുകയും ചെയ്തു. ജര്‍മനിയില്‍ ജോലി ചെയ്യുന്നയാളാണ് താന്‍ എന്നാണ് അര്‍ച്ചന യുവാവിനോട് പറഞ്ഞിരുന്നത്. ഇത് വിശ്വസിച്ച യുവാവ് പെണ്‍കുട്ടിയോട് സംസാരിക്കുന്നതിനായി തന്റെ ഫോണ്‍ നമ്പര്‍ നല്‍കി. അടുത്ത ഏതാനും ദിവസങ്ങള്‍ക്കുള്ളില്‍ ഇരുവരും തങ്ങളുടെ വ്യക്തിവിവരങ്ങളും താത്പര്യങ്ങളും പരസ്പരം പങ്കുവെച്ചു. തുടര്‍ന്ന് അര്‍ച്ചന വ്യാജ ക്രിപ്‌റ്റോകറന്‍സി നിക്ഷേപ വെബ്‌സൈറ്റിന്റെ ലിങ്ക് യുവാവിന് അയച്ചു നല്‍കി. ഇത് ബിറ്റ്‌കോയില്‍ അധിഷ്ഠിതമായാണ് പ്രവര്‍ത്തിച്ചിരുന്നത്. അതിന്റെ നേട്ടങ്ങള്‍ അര്‍ച്ചന യുവാവിനോട് പങ്കുവയ്ക്കുകയും ചെയ്തു.