KIA SONET | ബ്രെസയും വെന്യുവും നെക്സോണും പിന്നിലായി; ആദ്യമാസം തന്നെ സോണറ്റ് ഒന്നാമത്

രാജ്യത്തെ വാഹനവിപണിയിലെ ഏറ്റവും ജനപ്രിയ ശ്രേണിയായി മാറിയിരിക്കുകയാണ് കോംപാക്ട് എസ്.യു.വികളുടെ വിഭാഗം. കൂടുതൽ സ്ഥലസൌകര്യവും കരുത്തുമുള്ള വാഹനങ്ങളാണ് ഈ ശ്രേണിയിലുള്ളത്. നാലു മീറ്ററിൽ താഴെ മാത്രം നീളമുള്ള ഈ സബ് എസ്.യു.വി കാറുകൾ എസ്.യു.വി മോഡലുകളെ അപേക്ഷിച്ച് വില കുറവാണെന്നതും, എന്നാൽ ഏറെക്കുറെ അതിലുള്ള സവിശേഷതകളെല്ലാം ലഭ്യമാക്കുകയും ചെയ്യുന്നതാണ് ആകർഷകമാക്കുന്നത്. ഇന്ത്യൻ വാഹനവിപണിയിലെ സബ് എസ്.യു.വി വിഭാഗത്തിൽ ഏറെക്കാലമായി മുന്നിട്ടുനിന്നത് മാരുതി സുസുകി വിതാര ബ്രെസയും ഹ്യൂണ്ടായി വെന്യൂമൊക്കെയാണ്. മൂന്നാമതുള്ളത് ടാറ്റയുടെ ഫൈവ് സ്റ്റാർ സുരക്ഷയുള്ള നെക്സോൺ ആയിരുന്നു. നാലാമത് മഹീന്ദ്രയുടെ എക്സ്.യു.വി 3OOയും ആയിരുന്നു. എന്നാൽ ഈ വിഭാഗത്തിൽ അരങ്ങേറ്റം കുറിച്ച് ആദ്യ മാസം തന്നെ വിൽപനയിൽ ഒന്നാം സ്ഥാനം കരസ്ഥമാക്കിയിരിക്കുകയാണ് കിയയുടെ സോണറ്റ്.