കോഫി ഡേയ്ക്കെതിരെ പാപ്പരത്വ നടപടിക്ക് ഉത്തരവിട്ട് നാഷണൽ കമ്പനി ലോ ട്രൈബ്യൂണൽ; ഓഹരിയിൽ വൻ ഇടിവ്

ഓഗസ്റ്റ് 8-ന് എൻസിഎൽടിയുടെ (നാഷണൽ കമ്പനി ലോ ട്രിബ്യൂണൽ) ബെംഗളൂരു ബെഞ്ച് അംഗീകരിക്കുകയും കടത്തിൻ്റെ നടത്തിപ്പിനായി ഒരു ഇടക്കാല റെസലൂഷൻ പ്രൊഫഷണലിനെ നിയമിക്കുകയും ചെയ്തു. പാപ്പർ നടപടി ആരംഭിച്ച പശ്ചാത്തലത്തിൽ കമ്പനിയുടെ നിയന്ത്രണം ഇന്ററിം റൊസൊല്യൂഷൻ പ്രൊഫഷണലിന് കൈമാറി. കോഫി ഷോപ്പ് ശൃംഖല കൂടാതെ ബെംഗളൂരുവിൽ റിസോർട്ടും കമ്പനിക്കുണ്ട്. 2019 മാർച്ചിൽ കോഫി ഡേ എന്റർപ്രൈസസിൽ നിന്ന് 100 കോടി രൂപ മതിക്കുന്ന കടപ്പത്രങ്ങൾ (NCDs) ഐഡിബിഐ ട്രസ്റ്റീഷിപ്പ് സർവീസസ് വാങ്ങിയിരുന്നു.

ഇതിന്മേലുള്ള പലിശ സഹിതമുള്ള തിരിച്ചടവിൽ കോഫി ഡേ എന്റർപ്രൈസസ് പരാജയപ്പെട്ടതിനെ തുടർന്നാണ് കേസ് എൻസിഎൽടിക്ക് മുമ്പിലെത്തിയത്. ഐഡിബിഐ ട്രസ്റ്റീഷിപ്പ് സർവീസസിന് കമ്പനിക്കെതിരെ പാപ്പരത്ത നടപടി ആവശ്യപ്പെടാൻ അവകാശമില്ലെന്ന് കോഫി ഡേ എന്റർപ്രൈസസ് വാദിച്ചെങ്കിലും എൻസിഎൽടി അത് അംഗീകരിച്ചില്ല. 2016ലെ ഇൻസോൾവൻസി ആൻഡ് ബാങ്ക്റപ്റ്റ്സി കോഡ് (ഐബിസി) പ്രകാരമാണ് വായ്പ തിരിച്ചടയ്ക്കാൻ വീഴ്ച വരുത്തുന്ന സ്ഥാപനങ്ങൾക്കെതിരെ പാപ്പരത്തി നടപടി എടുക്കുന്നത്. ഐബിസിക്ക് വിധേയമാകുന്ന കമ്പനികളുടെ നിയന്ത്രണം പിന്നീട് ഇന്ററിം റെസൊല്യൂഷൻ പ്രൊഫഷണലിനെ ഏൽപ്പിക്കും.