Deep Seek ടെക് ഭീമന്‍മാരെ വിറപ്പിച്ച ചൈനയുടെ എഐ ആപ്പ്; എന്താണ് ഡീപ് സീക്?

കുറഞ്ഞ ചെലവില്‍ നിര്‍മ്മിച്ച എഐ മോഡലാണ് ഡീപ് സീക് എന്നാണ് നിര്‍മാതാക്കളുടെ അവകാശവാദം. OpenAI പോലുള്ള കമ്പനികള്‍ ചെലവഴിക്കുന്നതിനെക്കാള്‍ കുറഞ്ഞ ചെലവില്‍ മികവാര്‍ന്ന എഐ മോഡല്‍ വികസിപ്പിക്കാനായി എന്നും കമ്പനി അവകാശപ്പെടുന്നു. ടെക് ഭീമന്‍മാര്‍ ഉപയോഗിക്കുന്നതിനെക്കാള്‍ കുറഞ്ഞ ചെലവിലുള്ള സാങ്കേതികവിദ്യ അടിസ്ഥാനമാക്കി പ്രവര്‍ത്തിക്കുന്ന ചിപ്പുകളുപയോഗിച്ചാണ് ഈ മോഡല്‍ വികസിപ്പിച്ചെടുത്തത്.

സാങ്കേതികവിദ്യയിലെ ആധിപത്യത്തിനായുള്ള ചൈനയുടെ മുന്നേറ്റം തടയാനുള്ള അമേരിക്കന്‍ ശ്രമങ്ങളെക്കുറിച്ചും ഡീപ് സീകിന്റെ ഉദയം ചോദ്യങ്ങളുയര്‍ത്തുന്നു. ചൈനയിലേക്ക് നൂതന ചിപ്പുകള്‍ കയറ്റുമതി ചെയ്യുന്നതിന് യുഎസ് നിരോധനം ഏര്‍പ്പെടുത്തിയതും ഇതിനോട് ചേര്‍ത്ത് വായിക്കേണ്ടതാണ്. എഐയ്ക്ക് പ്രാധാന്യം നല്‍കണമെന്ന് ചൈനീസ് പ്രസിഡന്റ് ഷീ ജിന്‍പിംഗിന്റെ ആഹ്വാനവും ഡീപ് സീക് പോലെയുള്ള സ്റ്റാര്‍ട്ട് അപ്പുകള്‍ക്ക് വളമേകി.

രാഷ്ട്രീയപരമായ സെന്‍സിറ്റീവ് ചോദ്യങ്ങള്‍ അവഗണിക്കാനുള്ള പരിശീലനവും ഡീപ് സീക് ആപ്പിനുണ്ടെന്നാണ് റിപ്പോര്‍ട്ട്. ചൈനീസ് സര്‍ക്കാരിന്റെ സെന്‍സര്‍ഷിപ്പ് നയങ്ങള്‍ എഐ മോഡലുകള്‍ വികസിപ്പിക്കുന്നതിന് വെല്ലുവിളിയാകുമെന്ന് കരുതപ്പെട്ടിരുന്നു. എന്നാല്‍ ഇതുമായി ബന്ധപ്പെട്ട പരിശീലനം ലഭിച്ച മോഡലാണ് ഡീപ് സീക് എന്നാണ് വിദഗ്ധര്‍ പറയുന്നത്. സങ്കീര്‍ണ്ണമായ പ്രവര്‍ത്തികള്‍ ചെയ്യാനും ചില സെന്‍സിറ്റീവ് വിവരങ്ങള്‍ തടഞ്ഞുവെയ്ക്കാനും ഈ മോഡലിന് സാധിക്കുന്നുണ്ട്. മോഡലിനായി 60 ലക്ഷം ഡോളറിന് താഴെ മാത്രമാണ് ചെലവഴിച്ചതെന്നും അധികൃതര്‍ പറഞ്ഞു.

ഹൈ ഫ്‌ളൈയര്‍ എന്നറിയപ്പെടുന്ന ഒരു ഹെഡ്ജ് ഫണ്ടിന്റെ സിഇഒ കൂടിയാണ് ഇദ്ദേഹം. നിക്ഷേപ തീരുമാനങ്ങള്‍ എടുക്കുന്നതിന് സാമ്പത്തിക വിവരങ്ങള്‍ വിശകലനം ചെയ്യാന്‍ എഐ സാങ്കേതികവിദ്യ ഉപയോഗിക്കുന്ന സംരംഭമാണിത്. ക്വാണ്ടിറ്റേറ്റീവ് ട്രേഡിംഗ് എന്നാണ് ഇതറിയപ്പെടുന്നത്. അതേസമയം 2019ല്‍ 100 ബില്യണ്‍ യുവാന്‍ നേടുന്ന ചൈനയിലെ ആദ്യത്തെ ക്വാണ്ട് ഹെഡ്ജ് ഫണ്ടായി ഹൈ ഫ്‌ളൈയര്‍ മാറിയിരുന്നു. അതേവര്‍ഷം നടന്ന ഒരുപരിപാടിയ്ക്കിടെ ലിയാങ് പറഞ്ഞ വാക്കുകള്‍ വളരെ ചര്‍ച്ചയായിരുന്നു. "അമേരിക്കയ്ക്ക് ക്വാണ്ടിറ്റേറ്റീവ് ട്രേഡിംഗ് മേഖല വികസിപ്പിക്കാന്‍ കഴിയുമെങ്കില്‍ എന്തുകൊണ്ട് ചൈനയ്ക്ക് കഴിയില്ല?" എന്നായിരുന്നു അന്ന് അദ്ദേഹം ചോദിച്ചത്.

ഡീപ് സീകിന്റെ വരവ് നിരവധി ടെക് ഭീമന്‍മാരുടെ വിപണി മൂല്യത്തേയും ബാധിച്ചു. എന്‍വിഡിയയുടെ ഓഹരി വില 17 ശതമാനം ഇടിഞ്ഞതും വാര്‍ത്തയായിരുന്നു.

"ചൈനയിലെ ഡീപ് സീകിന്റെ വളര്‍ച്ച രാജ്യത്തിന്റെ സാങ്കേതികവിദ്യ വൈദഗ്ധ്യത്തിന്റെയും സ്വയംപര്യാപ്തയുടെയും തെളിവായി ആഘോഷിക്കപ്പെടുകയാണ്," എന്ന് സിഡ്‌നി യൂണിവേഴ്‌സിറ്റി ഓഫ് ടെക്‌നോളജിയിലെ അസോസിയേറ്റ് പ്രൊഫസറായ മറീന ഷാങ് പറഞ്ഞു.