രാജ്യം 5ജിയിലേക്ക് കടക്കുമ്പോൾ 4ജിയിലേക്ക് ബിഎസ്എൻഎൽ; തുടക്കം നവംബറിൽ

എന്നാൽ 4ജിയിലേക്ക് കടക്കാൻ വൈകിയെങ്കിലും 5ജി സേവനം അധികം താമസിയാതെ തുടങ്ങുമെന്നും ബിഎസ്എൻഎൽ അവകാശപ്പെടുന്നുണ്ട്. ഈ നവംബറിൽ 4ജി സേവനം ആരംഭിച്ച്, അടുത്ത വർഷം തന്നെ 5ജിയിലേക്ക് സേവനം ഉയർത്തുമെന്നാണ് ഇന്ത്യൻ മൊബൈൽ കോൺഗ്രസിൽ ബിഎസ്എൻഎൽ അറിയിച്ചത്.

നവംബറിൽ ആരംഭിക്കുന്ന 4ജി സേവനം എല്ലാ ഉപയോക്താക്കൾക്കും ഒരു വർഷത്തിനുള്ളിൽ എത്തിക്കാനാണ് ബിഎസ്എൻഎൽ ലക്ഷ്യമിടുന്നത്. ഇതിനായി 18 മാസത്തിനുള്ളിൽ 1.25 ലക്ഷം മൊബൈൽ സൈറ്റുകൾ രാജ്യത്ത് സ്ഥാപിക്കുന്നതിനുള്ള മുന്നൊരുക്കം ബിഎസ്എൻഎൽ ആരംഭിച്ചിട്ടുണ്ട്. ടിസിഎസും സി-ഡോട്ടുമായി ചേർന്നാണ് ബിഎസ്എൻഎൽ 4ജി സേവനങ്ങൾ ലഭ്യമാക്കുന്നത്. 2023ൽ തന്നെ ബിഎസ്എൻഎൽ 5ജി സേവനം ലഭ്യമാക്കുന്നതിനുള്ള നടപടിക്രമങ്ങൾ സർക്കാർ തലത്തിൽ ആരംഭിച്ചിട്ടുണ്ട്.

Also Read- വ്യൂ-വൺസ് മോഡിൽ അയച്ച ഫോട്ടോയും വീഡിയോയും ഇനി കൂടുതൽ ഭദ്രം; സ്ക്രീൻഷോട്ട് ബ്ലോക്ക് ചെയ്ത് വാട്സ്ആപ്പ്

സിംകാർഡ് 4ജിയിലേക്ക് അപ്ഡേറ്റ് ചെയ്യണമെന്ന് ആവശ്യപ്പെട്ടുകൊണ്ടുള്ള എസ്എംഎസ് സന്ദേശം കേരളത്തിലെ ബിഎസ്എൻഎൽ ഉപഭോക്താക്കൾക്ക് മാസങ്ങൾക്ക് മുമ്പ് തന്നെ ലഭിച്ചിരുന്നു. അതുകൊണ്ടുതന്നെ 4ജി സേവനം ആദ്യമായി തുടങ്ങുന്ന നഗരങ്ങളുടെ പട്ടികയിൽ കേരളത്തിലെ നഗരങ്ങളും ഉണ്ടാകുമെന്നാണ് പ്രതീക്ഷിക്കുന്നത്.