Meta| മെറ്റയുടെ ഇന്‍സ്റ്റഗ്രാം ഏജ് വെരിഫിക്കേഷന്‍ ടെസ്റ്റ് ആറു രാജ്യങ്ങളിലേക്ക് കൂടി

” ഇന്ന് മുതല്‍ യൂറോപ്പ്, മെക്‌സിക്കോ, കാനഡ, ദക്ഷിണ കൊറിയ , ഓസ്‌ട്രേലിയ, ജപ്പാന്‍ എന്നിവിടങ്ങളിലേക്ക് കൂടി ഇന്‍സ്റ്റഗ്രാമിലെ ഞങ്ങളുടെ ഏജ് വെരിഫിക്കേഷന്‍ ടെസ്റ്റ് വ്യാപിപ്പിക്കുകയാണ്,” വ്യാഴാഴ്ച പുറത്തിറക്കിയ കമ്പനി പ്രസ്താവനയില്‍ പറയുന്നു. കുറച്ച് മാസത്തിനുള്ളില്‍ ലോകത്തെ എല്ലാ രാജ്യങ്ങളിലേക്കും ഈ പരിഷ്‌കാരം വ്യാപിപ്പിക്കുമെന്നും കമ്പനി വൃത്തങ്ങള്‍ അറിയിച്ചു.

ഇക്കഴിഞ്ഞ ജൂണില്‍ അമേരിക്ക ആസ്ഥാനമാക്കി പ്രവര്‍ത്തിക്കുന്നവരിലാണ് ഈ പരിഷ്‌കാരം ആദ്യം ആരംഭിച്ചത്. ഇന്‍സ്റ്റഗ്രാം ഉപയോക്താക്കള്‍ക്കാണ് ഏജ് വെരിഫിക്കേഷന്‍ ടെസ്റ്റ് നടത്തുന്നതിനുള്ള ഓപ്ഷനുകള്‍ കമ്പനി ആദ്യം നല്‍കിയത്. പിന്നീട് ഒക്‌ടോബര്‍ ആയപ്പോഴേക്കും ഈ സംവിധാനം ഇന്ത്യയിലേക്കും ബ്രസീലിലേക്കും വ്യാപിപ്പിച്ചിരുന്നു.

പതിനെട്ട് വയസ്സിന് താഴെയുള്ളവര്‍ തങ്ങളുടെ ഇന്‍സ്റ്റഗ്രാം ജനനതീയതിയില്‍ മാറ്റങ്ങള്‍ വരുത്തി പതിനെട്ട് വയസ്സോ അതിന് മുകളിലോ ആക്കിയാല്‍ അവര്‍ക്ക് ഈ വെരിഫിക്കേഷന്‍ ടെസ്റ്റ് നടത്തേണ്ടി വരും. പ്രായം തെളിയിക്കുന്ന ഒറിജിനല്‍ ഐഡി കാര്‍ഡ്, അല്ലെങ്കില്‍ തങ്ങളുടെ പ്രായം കൃത്യമായി പറയുന്ന വീഡിയോയോ അല്ലെങ്കില്‍ സുഹൃത്ത് സാക്ഷ്യപ്പെടുത്തുന്ന വീഡിയോയോ അപ്ലോഡ് ചെയ്യേണ്ടി വരുന്നതാണ്.

കൗമാരക്കാര്‍ക്കും യുവാക്കള്‍ക്കും തങ്ങളുടെ പ്രായത്തിനൊത്ത കാര്യങ്ങളാണ് ലഭിക്കുന്നത് എന്ന് ഉറപ്പുവരുത്താനാണ് ഈ പുതിയ നിര്‍ദ്ദേശം എന്നാണ് കമ്പനി അധികൃതര്‍ പറയുന്നത്.

ഏജ് വെരിഫിക്കേഷന്‍ ടെസ്റ്റിംഗ് ടൂള്‍ കൂടാതെ വ്യക്തികളുടെ പ്രായം തിരിച്ചറിയാന്‍ ആര്‍ട്ടിഫിഷ്യല്‍ ഇന്റലിജന്‍സ് സാങ്കേതിക വിദ്യയും ഉപയോഗിക്കുന്നുണ്ടെന്നും കമ്പനി വൃത്തങ്ങള്‍ അറിയിച്ചു.