ശബരിമല ദർശനത്തിന് പോയ അധ്യാപികയ്ക്ക് വധഭീഷണി; വീട് ഒഴിയാൻ ഉടമസ്ഥന്‍റെ നിർദ്ദേശം

ഞായറാഴ്ച ആയിരുന്നു ബിന്ദു ശബരിമല സന്ദർശനത്തിനായി പുറപ്പെട്ടത്. പമ്പയിൽ പ്രതിഷേധക്കാർ തടഞ്ഞതിനെ തുടർന്ന് ഇവർ മടങ്ങുകയായിരുന്നു. ഇവർ ജോലി ചെയ്യുന്ന കോഴിക്കോട് മെഡിക്കൽ കോളേജ് ക്യാംപസ് ഹയർ സെക്കൻഡറി സ്കൂളിലേക്ക് ഹനുമാൻ സേനയുടെ നേതൃത്വത്തിൽ പ്രതിഷേധം നടത്തിയിരുന്നു.

ഇതിനു പിന്നാലെയാണ് ചേവായൂരിൽ ഇവർ താമസിക്കുന്ന വാടകവീട് ഒഴിയണമെന്ന് വീട്ടുടമസ്ഥൻ ആവശ്യപ്പെട്ടത്. ഇതിനെ തുടർന്ന് ഇവർക്ക് ഇപ്പോൾ വാടകവീട്ടിലേക്ക് പോകാൻ കഴിയാത്ത സാഹചര്യമാണ് ഉള്ളത്. സ്കൂളിലേക്ക് ചെന്നാൽ പ്രതിഷേധമുണ്ടാകുമോ എന്ന പ്രധാന അധ്യാപികയുടെ ആശങ്കയെ തുടർന്ന് അവധിയിൽ പ്രവേശിച്ചിരിക്കുകയാണ് ബിന്ദു.

ഭീഷണിയെ തുടർന്ന് കസബ പൊലീസിൽ ഇപ്പോൾ പരാതി നൽകി. പൊലീസീന്‍റെ നിർദ്ദേശത്തെ തുടർന്ന് ഇവർ രഹസ്യകേന്ദ്രത്തിലേക്ക് മാറിയിരിക്കുകയാണ്. കസബ പൊലീസിൽ പരാതിപ്പെട്ട ഇവർ പൊലീസ് സംരക്ഷണം വേണമെന്നും ആവശ്യപ്പെട്ടിട്ടുണ്ട്.