Copa America 2021 | കോപ്പാ അമേരിക്ക ടൂർണമെൻ്റ് മുടങ്ങുമോ? വിയോജിപ്പ് പ്രകടിപ്പിച്ച് കൂടുതൽ താരങ്ങൾ

കോപ്പാ അമേരിക്ക ടൂർണമെൻ്റിനെ വിടാതെ പിന്തുടരുകയാണ് പ്രതിസന്ധികൾ. പല വിധ പ്രശ്നങ്ങൾ കാരണം ടൂർണമെൻ്റ് നടത്താൻ ഉദ്ദേശിച്ച വേദികൾ മാറ്റി അവസാനം ജൂൺ 13നു ബ്രസീലിൽ വെച്ചു നടത്താൻ തീരുമാനമായെങ്കിലും ഇതുമായി ബന്ധപ്പെട്ട വിവാദങ്ങൾ ഇനിയും അവസാനിച്ചിട്ടില്ല. ടൂർണമെൻ്റ് അടുക്കുംതോറും പുതിയ പുതിയ പ്രശ്നങ്ങൾ ഉയർന്നു വന്നുകൊണ്ടിരിക്കുകയാണ്. കോവിഡ് വ്യാപനം ശക്തമായി കൊണ്ടിരിക്കുന്ന അവസ്ഥയാണ് ബ്രസീൽ ഉൾപ്പെടെയുള്ള ലാറ്റിനമേരിക്കയിലെ മിക്ക രാജ്യങ്ങളിലും ഉള്ളത്. ഇതിൽ ബ്രസീലിലാണ് കോവിഡ് വ്യാപനം അതിരൂക്ഷമായി തുടരുന്നത്. രോഗം ബാധിച്ചു മരിച്ചവരിൽ ലോകത്ത് രണ്ടാം സ്ഥാനത്തുള്ള രാജ്യമാണ് ബ്രസീൽ. അതുകൊണ്ട് തന്നെ ബ്രസീലിലേക്ക് വേദി മാറ്റിയതിൽ ബ്രസീലിയൻ താരങ്ങളുൾപ്പെടെ നിരവധി പേർക്ക് ശക്തമായ എതിർപ്പുണ്ട്. ഇതിൽ നേരത്തെ തന്നെ ബ്രസീൽ താരങ്ങൾ നിലപാട് വ്യക്തമാക്കിയിരുന്നു. ഇപ്പോഴിതാ എതിർപ്പ് പ്രകടിപ്പിച്ച് കൂടുതൽ താരങ്ങൾ രംഗത്ത് വരുന്നതായാണ് റിപ്പോർട്ടുകൾ. എതിർപ്പുമായി കൂടുതൽ താരങ്ങൾ വരുന്ന സ്ഥിതിയിൽ ഇവരുടെയെല്ലാം എതിർപ്പുകളെ അവഗണിച്ച് ടൂർണമെൻ്റ് നടത്താൻ കഴിയുമോ എന്നത് സംശയമാണ്.