'റായുഡുവിനെ ലോകകപ്പ് ടീമിലെടുക്കാത്തതിന് പിന്നില്‍ പക്ഷപാതമോ?' താരത്തിന്റെ വിരമിക്കലിനെക്കുറിച്ച് ചീഫ് സെലക്ടര്‍ പറയുന്നു

റായുഡുവിനെ ഒഴിവാക്കാനുള്ളകാരണവും വിജയ് ശങ്കറിനെയും പന്തിനെയും ഉള്‍പ്പെടുത്തിയതിനു പിന്നിലെ കാരണങ്ങളും തങ്ങള്‍ നേരത്തെ വ്യക്തമാക്കിയതാണെന്ന് പറഞ്ഞ എംഎസ്‌കെ പ്രസാദ് താരത്തെ ഒഴിവാക്കിയതിനു പിന്നില്‍ പക്ഷപാതമോ ഇഷ്ടക്കാരെ തിരുകി കയറ്റാനുള്ള ശ്രമമോ അല്ലെന്നും കൂട്ടിച്ചേര്‍ത്തു. 'ചില ടീം കോംബിനേഷനുകള്‍ കാരണമാണ് ലോകകപ്പ് ടീമില്‍ റായുഡുവിനെ എടുക്കാന്‍ കഴിയാതിരുന്നത്. അതിനര്‍ത്ഥം സെലക്ഷന്‍ കമ്മിറ്റി പക്ഷപാതപരമായി പെരുമാറി എന്നല്ല' എംഎസ്‌കെ പറഞ്ഞു.

റായുഡുവിനെ ഏകദിന ടീമിലെടുത്തത് ടി20 പ്രകടനങ്ങളുടെ അടിസ്ഥാനത്തിലായിരുന്നെന്ന് പറഞ്ഞ സെലക്ടര്‍ അന്ന് അതിന്റെ പേരില്‍ ഏറെ വിമര്‍ശനം ഉയര്‍ന്നിരുന്നെന്നും കൂട്ടിച്ചേര്‍ത്തു. ടീമില്‍ നിന്ന് ഒഴിവാക്കിയപ്പോള്‍ റായുഡു ഇട്ട ത്രിഡി ട്വീറ്റ് താന്‍ ആസ്വദിച്ചിരുന്നെന്നും അത് സമയോചിതമായിരുന്നെന്നും ചീഫ് സെലക്ടര്‍ പറഞ്ഞു.