കളിക്കളത്തിലെത്തുന്ന താരങ്ങളുടെ കൈപിടിച്ചെത്തുന്ന കുട്ടികൾ; അറിയാം പ്ലെയർ എസ്കോർട്ടിനെ കുറിച്ച്

ഫുട്ബോൾ മൈതാനത്ത് കളിക്കാർക്കൊപ്പം കൈപിടിച്ച് കുട്ടികൾ എത്തുന്ന പതിവ് തുടങ്ങിയിട്ട് അധികം കാലമായിട്ടില്ല. 1990 കൾക്ക് ശേഷമാണ് ഈ രീതി പിന്തുടരുന്നത്. ഓരോ താരങ്ങൾക്കും അകമ്പടിയായി പ്ലേയർ എസ്കോർട്ട് എത്തുന്ന രീതി ആദ്യമായി കണ്ട പ്രധാന ഇവന്റ് 2000 ലെ യുവേഫ യോറ കപ്പ് ആയിരുന്നു. അതുവരെ താരങ്ങൾ പരസ്പരം കൈപിടിച്ചായിരുന്നു മൈതാനത്തിലേക്ക് വന്നിരുന്നത്.

കളിക്കാർ കുട്ടികളുടെ അകമ്പടിയോടെ മൈതാനത്തിൽ എത്തുന്നതിന് പിന്നിൽ നിരവധി കാരണങ്ങളുണ്ട്. കുട്ടികളുടെ അവകാശങ്ങൾക്കു വേണ്ടിയുള്ള പ്രചരണങ്ങളെ പ്രോത്സാഹിപ്പിക്കുക, പരസ്പരം പോരാടുന്ന മത്സരങ്ങൾക്കിടയിലും കളിയുടെ നിഷ്കളങ്കത നിലനിർത്തുക, കുട്ടികളുടെ സ്വപ്നസാക്ഷാത്കാരം അതിലൂടെ അവർക്കുണ്ടാകുന്ന നേട്ടം തുടങ്ങിയവയെല്ലാം ഇതിൽപെടും. ഏറ്റവും പ്രധാനപ്പെട്ടത്, ഈ കുട്ടികൾക്ക് മാതൃകയാകേണ്ടവരാണ് തങ്ങളെന്നും തങ്ങളെ കണ്ടാണ് അവർ ഉറ്റുനോക്കുന്നതെന്നും കളിക്കാരെ ഓർമിപ്പിക്കുക എന്നതാണ്.