തിയേറ്ററുകളില്‍ ജൈത്രയാത്ര തുടര്‍ന്ന് കണ്ണൂര്‍ സ്‌ക്വാഡ്; ടീമിനെ വീട്ടിലേക്ക് വിളിച്ച് വിജയം ആഘോഷിച്ച് മമ്മൂട്ടി

മമ്മൂട്ടിയെ കേന്ദ്രകഥാപാത്രമാക്കി നവാഗതനായ റോബി വർഗീസ് രാജ് സംവിധാനം ചെയ്ത ‘കണ്ണൂർ സ്ക്വാഡ്’ തിയറ്ററുകളിൽ ഗംഭീര പ്രകടനം കാഴ്ചവച്ച് മുന്നേറുകയാണ്. ആദ്യ ആദ്യദിനങ്ങളില്‍ തന്നെ ചിത്രം പ്രേക്ഷകര്‍ ഏറ്റെടുത്ത് കഴിഞ്ഞിരുന്നു.

ഇപ്പോഴിതാ ചിത്രത്തിന്റെ വിജയം വീട്ടിൽ ആഘോഷിച്ചിരിക്കുകയാണ് മമ്മൂട്ടി. ചിത്രത്തിലെ അണിയറ പ്രവർത്തകരും അഭിനേതാക്കളുമെല്ലാം വിജയാഘോഷത്തിൽ പങ്കെടുത്തിരുന്നു.

കൂടാതെ നടൻ കുഞ്ചാക്കോ ബോബനും ആഘോഷത്തിൽ പങ്കുചേർന്നിരുന്നു. ഇതിന്റെ ചിത്രങ്ങൾ സമൂഹ മാധ്യമങ്ങളിൽ വൈറലായി മാറിയിരിക്കുകയാണ്. മമ്മൂട്ടി കമ്പനിയുടെ ഫേസ്ബുക്ക് പേജിലും വിജയാഘോഷത്തിന്റെ ചിത്രം പങ്കുവച്ചിട്ടുണ്ട്.

സംവിധായകനായ റോബി വർഗീസ് രാജ്, റോണി ഡേവിഡ്, സുഷിൻ ശ്യാം, ശബരീഷ് തുടങ്ങി സിനിമയുടെ പിന്നിൽ പ്രവർത്തിച്ചവരെല്ലാവരും തന്നെ വിജയം ആഘോഷിക്കാന്‍ എത്തിയിരുന്നു.

മിഷൻ അക്കംബ്ലിഷ്‍ഡ് എന്ന് എഴുതിയ കേക്ക് മുറിച്ചായിരുന്നു ആഘോഷം. ചിത്രങ്ങൾ സിനിമയുടെ നിർമാതാക്കളായ മമ്മൂട്ടി കമ്പനി സോഷ്യൽ മീഡിയയിൽ പങ്കുവച്ചു.

'കണ്ണൂര്‍ സ്‌ക്വാഡി'നെ ഏറ്റെടുത്ത പ്രേക്ഷകരോട് മമ്മൂട്ടി നന്ദി പറഞ്ഞു. സോഷ്യല്‍ മീഡിയയിലൂടെയാണ് നന്ദി അറിയിച്ചത്.

'കണ്ണൂര്‍ സ്‌ക്വാഡിന് നല്‍കിയ പിന്തുണ ഞങ്ങള്‍ മുഴുവൻ ടീം അംഗങ്ങളുടെയും ഹൃദയം നിറയ്‌ക്കുന്നു. നിങ്ങള്‍ ഓരോരുത്തര്‍ക്കും വളരെയധികം നന്ദിയുണ്ട്.

നാമെല്ലാവരും ആഴത്തില്‍ വിശ്വസിക്കുകയും ആത്മാര്‍ത്ഥമായി പരിശ്രമിക്കുകയും ചെയ്ത സിനിമയാണിത്. ഇത്രയധികം സ്‌നേഹം ലഭിച്ചതിന് വളരെ സന്തോഷമുണ്ട്'-എന്നാണ് മമ്മൂട്ടി ഫേസ്ബുക്കില്‍ കുറിച്ചു.