Anaswara Rajan Mammootty: അനശ്വരയുടെ സ്വന്തം മമ്മൂട്ടിച്ചേട്ടൻ; മോഹം സഫലമാക്കി താരം

ബാലതാരമായി എത്തി മലയാളികളുടെ പ്രിയം നേടിയ താരമാണ് അനശ്വര രാജൻ. ഉദാഹരണം സുജാത എന്ന ചിത്രത്തിലൂടെ ആതിര കൃഷ്ണനായെത്തിയ അനശ്വര പിന്നീട് നിരവധി മനോഹരമായ കഥാപാത്രങ്ങളിലൂടെ പ്രേക്ഷക ഹൃദയം കീഴടക്കി. ഇപ്പോഴിതാ തന്റെ ജീവിത്തിലെ ഏറ്റവും വലിയ മോഹം സഫലമാക്കിയ സന്തോഷം പങ്കുവെച്ചിരിക്കുകയാണ് അനശ്വര.

നടൻ മമ്മൂട്ടിയുടെ കടുത്ത ആരാധികയായ അനശ്വര അദ്ദേഹത്തിനൊപ്പം ഫോട്ടോയെടുത്ത് അതിൽ ഓട്ടോഗ്രാഫ് വാങ്ങി. ഈ ചിത്രങ്ങൾ അനശ്വര തന്നെ സമൂഹമാധ്യമങ്ങളിൽ പങ്കുവെച്ചിട്ടുണ്ട്. ജോഫിൻ ടി ചാക്കോ സംവിധാനം ചെയ്ത് ആസിഫ് അലി, അനശ്വര രാജൻ എന്നിവർ കേന്ദ്ര കഥാപാത്രങ്ങളായി എത്തിയ ഇൻവെസ്റ്റിഗേഷൻ ഡ്രാമ സിനിമയാണ് രേഖാചിത്രം.

ഇതിൽ മമ്മൂട്ടിയുടെ ആരാധിക രേഖ എന്ന ടൈറ്റിൽ ക്യാരക്ടറിലാണ് അശ്വര എത്തിയത്. ജീവിതത്തിലും ഒരു മമ്മൂട്ടി ഫാനായ തനിക്ക് ഈ കഥാപാത്രം ചെയ്യാനായതിന്റെ സന്തോഷത്തിലാണ് നടി.ഒരാഴ്ചമുൻപ് അണിയറപ്രവർത്തകർ മമ്മൂട്ടിയുടെ വീട്ടിൽ ഒന്നിച്ചപ്പോഴാണ് മമ്മൂക്കയ്ക്കൊപ്പം ആ ഫാൻ മൊമന്റ് ചിത്രം അനശ്വര പകർത്തിയത്.

മമ്മൂക്കയെ വീണ്ടും കാണാൻ അവസരം കിട്ടിയപ്പോൾ ആ ഫോട്ടോ പ്രിന്റടിച്ച് കയ്യിൽ കരുതി. അതിൽ സ്നേഹപൂർവം മമ്മൂട്ടിച്ചേട്ടൻ എന്നെഴുതി ഒപ്പിട്ടു വാങ്ങുകയായിരുന്നു.പ്രിയപ്പെട്ട മമ്മൂട്ടി ചേട്ടന്; ഒത്തിരി സ്നേഹത്തോടെ അനുജത്തി രേഖ പത്രോസ് എന്ന ക്യാപ്‍ഷനോടെ മമ്മൂട്ടിക്കൊപ്പമുള്ള ചിത്രം അനശ്വര ഇൻസ്റ്റ​ഗ്രാമിൽ പങ്കുവെച്ചിട്ടുണ്ട്.

ആസിഫ് അലി, അനശ്വര രാജൻ എന്നിവരെ കൂടാതെ മനോജ് കെ ജയൻ, ഭാമ അരുൺ, സിദ്ദിഖ്, ജഗദീഷ്, സായ് കുമാർ, ഇന്ദ്രൻസ്, ശ്രീകാന്ത് മുരളി, നിഷാന്ത് സാഗർ, പ്രേംപ്രകാശ്, ഹരിശ്രീ അശോകൻ, സുധികോപ്പ, മേഘ തോമസ്, ‘ആട്ടം’ സിനിമയിലൂടെ കൈയ്യടി നേടിയ സെറിൻ ഷിഹാബ് തുടങ്ങി വലിയൊരു താരനിര തന്നെ ചിത്രത്തിലുണ്ട്.

അതേസമയം ഫഹദ് ഫാസിൽ പ്രൊഡക്ഷൻസിന്റെ പൈങ്കിളി, വിപിൻ ദാസ് സംവിധാനം ചെയ്ത 'വ്യസനസമേതം ബന്ധുമിത്രാദികൾ', മിസ്‌റ്റർ ആൻ ഡ് മിസിസ് ബാച്ചർ, പെരുങ്കളി യാട്ടം, തമിഴിൽ" ലക്കി', സെവൻ ജി റെയ്ൻബോ കോളനി 2 എന്നീ ചിത്രങ്ങളും പേരിടാത്ത തെലുങ്കുചിത്രവും അനശ്വരയുടേ തായി ഈ വർഷം തിയറ്ററുകളിലെത്താനുള്ളത്.