ഹണിറോസ് ഉദ്ഘാടനത്തിന് അയർലൻഡിൽ; താരത്തിനൊപ്പം മന്ത്രിയുടെ സെൽഫി

സിനിമയ്ക്കുപുറമെ ഉദ്ഘാടന ചടങ്ങുകളിലും താരമായി മാറുകയാണ് നടി ഹണിറോസ്. കേരളത്തിൽ അങ്ങോളമിങ്ങോളമുള്ള സ്ഥാപനങ്ങളുടെ ഉദ്ഘാടനത്തിലൂടെ താരം മിന്നിത്തിളങ്ങുകയാണ്. ഉദ്ഘാടന ചടങ്ങുകളിലെ ഹണിറോസിന്‍റെ വീഡിയോയും ചിത്രങ്ങളുമെല്ലാം സോഷ്യൽ മീഡിയയിൽ അതിവേഗം വൈറലാകാറുണ്ട്. ഈ ചിത്രങ്ങളും വീഡിയോയുമെല്ലാം ഹണിറോസ് തന്നെയാണ് ഇന്‍സ്റ്റഗ്രാമില്‍ പങ്കുവെയ്ക്കുന്നത്.

ഇപ്പോഴിതാ, ഹണിറോസ് ഉദ്ഘാടനത്തിനായി കടൽ കടന്നിരിക്കുകയാണ്. അയർലൻഡിൽ ഒരു ഉദ്ഘാടന ചടങ്ങിന് താരം പോയതിന്‍റെ ദൃശ്യങ്ങളും വീഡിയോയുമൊക്കെയാണ് വൈറലാകുന്നത്.

കുടുംബസമേതമാണ് ഹണിറോസ് അയർലൻഡിൽ എത്തിയത്. ഇതിന്‍റെ ചിത്രങ്ങളും വീഡിയോയുമൊക്കെ ഹണിറോസ് തന്നെ ഇൻസ്റ്റാഗ്രാമിൽ പങ്കുവെച്ചിട്ടുണ്ട്.

അയർലൻഡിൽ ഒരു സംഘടന നടത്തുന്ന മെഗാ മേള ഉദ്ഘാടനം ചെയ്യാനാണ് ഹണി റോസ് എത്തിയത്. ഡബ്ലിന്‍ വിമാനത്താവളത്തിന് അടുത്തുള്ള ആല്‍സ സ്‌പോര്‍ട്‌സ് സെന്ററിന്റെ ഗ്രൗണ്ടിലായിരുന്നു ചടങ്ങ്.

ജീവിതത്തിൽ ആദ്യമായി അയര്‍ലന്‍ഡിൽ എത്തുന്ന ഹണിയെ കാണാന്‍ നിരവധി മലയാളികള്‍ ചടങ്ങിന് എത്തിയിരുന്നു. എന്നാൽ ഹണിയോടൊപ്പം സെൽഫിയെടുത്ത അയർലൻഡ് മന്ത്രിയുടെ ചിത്രമാണ് ഇപ്പോൾ സമൂഹമാധ്യമങ്ങളിൽ തരംഗമാകുന്നത്.

ഉദ്ഘാടന ചടങ്ങിൽ പങ്കെടുത്ത അയര്‍ലന്‍ഡ് ഗതാഗതമന്ത്രി ജാക്ക് ചാംബേഴ്‌സ് ഹണിക്കൊപ്പമുള്ള സെല്‍ഫി ചിത്രം ഫേസ് ബുക്കിൽ ഷെയർ ചെയ്തു. നാലായിരത്തിലധികം ആളുകള്‍ പരിപാടിയില്‍ പങ്കെടുത്തെന്നും മന്ത്രി ഫേസ്ബുക്കിൽ വ്യക്തമാക്കുന്നു.

അയർലൻഡിലെത്തിയ ഹണിറോസിനെ കാണാനായി മലയാളി ആരാധകരും സെൽഫി എടുക്കുന്നതിന്‍റെ തിരക്കിലായിരുന്നു. സെൽഫി ആവശ്യപ്പെട്ട ഒരാളെപ്പോലും നിരാശരാക്കാതെ ഹണിറോസ് ക്ഷമയോടെ എല്ലാവർക്കുമൊപ്പം പോസ് ചെയ്തു. വിവിധ മലയാളി സംഘടനകളും ഹണിറോസിനെ സ്വീകരിച്ചു. 

അയർലൻഡിലെത്തിയ ഹണിറോസിന്‍റെ ചിത്രങ്ങളും സോഷ്യൽ മീഡിയയിൽ വൈറലാണ്. നൂറുകണക്കിന് ആളുകളാണ് ഈ പോസ്റ്റുകളിൽ ലൈക് ചെയ്യുകയും കമന്‍റ് ചെയ്യുകയും ചെയ്യുന്നത്.