അഭിഷേക് ബച്ചനേക്കാൾ നാല് മടങ്ങ് ആസ്തി കൂടുതൽ; ഐശ്വര്യയുടെ പ്രതിഫലമോ 10 കോടിക്ക് മുകളിൽ

സമ്പന്നതയിൽ മുന്നിൽ നിൽക്കുന്ന നടിമാരിൽ ഒരാളാണ് ഐശ്വര്യ റായ്. സിനിമയിൽ ഇപ്പോൾ സജീവമല്ലെങ്കിലും സമ്പത്തിന്റെ കാര്യത്തിൽ താരം ഒട്ടും പിന്നിലല്ല.

ഭർത്താവും ബോളിവുഡിലെ പ്രമുഖ നടനുമായ അഭിഷേക് ബച്ചനെക്കാൾ  ഐശ്വര്യ റായിക്ക് സമ്പത്തുണ്ടെന്നാണ് റിപ്പോർട്ടുകളിൽ പറയുന്നത്. ഏകദേശം 862 കോടിയാണ് നടിയുടെ ആസ്തിയെന്നാണ് മാധ്യമ റിപ്പോർട്ട്.

അഭിനയം മാത്രമല്ല സമ്പത്തിൻ്റെ കാര്യത്തിലും ഐശ്വര്യ പ്രശസ്തയാണ്. 862 കോടി രൂപയുടെ ആസ്തിയുള്ള ഐശ്വര്യ ഇന്ത്യയിലെ ഏറ്റവും ധനികയായ നടിയാണ്. അഭിനയം, ബ്രാൻഡ് അംഗീകാരങ്ങൾ, മറ്റ് ബിസിനസ്സ് സംരംഭങ്ങൾ എന്നിവയിൽ നിന്നാണ് ഐശ്വര്യയുടെ വരുമാനം.

ബോളിവുഡിൽ ഏറ്റവും കൂടുതൽ പ്രതിഫലം വാങ്ങുന്ന നടിമാരിൽ ഒരാൾ കൂടിയാണ് ഐശ്വര്യ. ഒരു സിനിമക്ക് 10 മുതൽ 12 കോടിവരെയാണ് ഐശ്വര്യയുടെ പ്രതിഫലം. പരസ്യത്തിനും വൻ പ്രതിഫലമാണ് നടി കൈപ്പറ്റുന്നത്. ആറ് മുതൽ ഏഴ് കോടി രൂപവരെ വാങ്ങാറുണ്ടെന്നാണ് റിപ്പോർട്ടുകൾ.

ഭർത്താവ് അഭിഷേക് ബച്ചനും 250 കോടിയുടെ ആസ്തിയുള്ള ബോളിവുഡിലെ മുൻനിര നടനാണ്. അടുത്തിടെ ഇരുവരും വിവാഹമോചനം നേടിയതായി അഭ്യൂഹങ്ങളുണ്ടായിരുന്നെങ്കിലും, ഇരുവരും വിഷയത്തിൽ പ്രതികരിച്ചിട്ടില്ല.