'വിവാഹമോചനം കഴിഞ്ഞിട്ട് മാസങ്ങളായി; ഷൊയ്ബിന് ആശംസകൾ'; ഒടുവില്‍ പ്രതികരിച്ച് സാനിയ മിര്‍സ

ഹൈദരാബാദ്: പാക് ക്രിക്കറ്റ് താരം ഷൊയ്ബ് മാലിക്കുമായുള്ള വിവാഹമോചന വിഷയത്തിൽ പ്രതികരിച്ച് മുൻ ഇന്ത്യൻ ടെന്നീസ് താരം സാനിയ മിർസ. വിവാഹമോചനം കഴിഞ്ഞിട്ട് മാസങ്ങളായെന്നും വിഷയത്തിൽ അഭ്യൂഹങ്ങള്‍ പ്രചരിപ്പിക്കരുതെന്നും സാനിയ മിര്‍സ പറഞ്ഞു.

തന്റെ സ്വകാര്യത മാനിക്കണമെന്നും സാനിയ അഭ്യര്‍ത്ഥിച്ചു. ഷൊയ്ബ് മാലിക്കിന് ആശംസകള്‍ നേരുന്നുവെന്നും സാനിയ പ്രതികരിച്ചു.

പാക് നടി സന ജാവേദിനെ വിവാഹം ചെയ്ത വിവരം ഷൊയ്ബ് മാലിക് കഴിഞ്ഞ ദിവസം ട്വിറ്ററിലൂടെ അറിയിച്ചിരുന്നു. ഇതിന് പിന്നാലെയാണ് താരവും കുടുംബവും വിഷയവുമായി ബന്ധപ്പെട്ട് ഒരു പ്രസ്താവന പുറത്തുവിടുന്നത്.

കുടുംബം പുറത്തുവിട്ട പ്രസ്താവനയില്‍ പറയുന്നത് ഇങ്ങനെ: 'പൊതുസമൂഹത്തില്‍ നിന്നും സാനിയ എപ്പോഴും തന്റെ വ്യക്തിജീവിതം മാറ്റിനിര്‍ത്തിയിരുന്നു. എന്നാലിന്ന് ഷുഐബും അവളും കുറച്ചു മാസങ്ങള്‍ക്കുമുന്‍പ് വേര്‍പിരിഞ്ഞതാണെന്ന് വെളിപ്പെടുത്തേണ്ട ആവശ്യമുണ്ടായിരിക്കുകയാണ്.

പുതിയ ജീവിതത്തിന് ഷുഐബിന് എല്ലാ ആശംസകള്‍ അവള്‍ അറിയിച്ചിട്ടുണ്ട്. ഇങ്ങനെയൊരു നിമിഷത്തില്‍ അഭ്യൂഹങ്ങള്‍ പ്രചരിപ്പിക്കരുതെന്നും അവളുടെ സ്വകാര്യതയെ ബഹുമാനിക്കണമെന്നും എല്ലാ ആരാധകരോടും അഭ്യുദയകാംക്ഷികളോടും അഭ്യര്‍ഥിക്കുകയാണ്',