കൈലി മുണ്ടുടുത്ത്, കണ്ണ് ചുവപ്പിച്ച്, വശപിശകായി ഒരാൾ വേലിക്കരികിൽ; സെറ്റിൽ കണ്ടയാളെക്കുറിച്ച് ബിന്ദു പണിക്കർ

തിയേറ്ററിൽ കയറി എല്ലാം മറന്ന് ചിരിക്കാൻ പ്രേക്ഷകർക്ക് അവസരം നൽകിയ താരങ്ങളിൽ ബിന്ദു പണിക്കരുടെ (Bindu Panicker) പേര് പറയാതിരിക്കാൻ സാധിക്കില്ല. തിയേറ്റർ വിട്ട് ആ ചിത്രങ്ങൾ മിനി സ്‌ക്രീനിൽ എത്തിയപ്പോഴും പ്രേക്ഷകർ പഴയതിലും ഊർജസ്വലമായി ചിരിച്ചു. ഇന്ന് ക്യാരക്ടർ വേഷങ്ങളാണ് ബിന്ദുവിനെ തേടി കൂടുതലും എത്തുന്നത്

എന്നാലും വൈവിധ്യം നിറയുന്ന കഥാപാത്രങ്ങളെ സ്‌ക്രീനിൽ എത്തിക്കാൻ എക്കാലത്തും ബിന്ദു പണിക്കർ ശ്രദ്ധിച്ചു. മുൻകാലങ്ങളിൽ വേഷമിട്ട നിരവധി ചിത്രങ്ങളിൽ ഒന്നിന്റെ സെറ്റിൽ എത്തിയപ്പോഴത്തെ തന്റെ അനുഭവം ബിന്ദു അടുത്തിടെ നൽകിയ ഒരഭിമുഖത്തിൽ പറയുകയുണ്ടായി (തുടർന്ന് വായിക്കുക)

കുഞ്ഞിക്കൂനൻ സിനിമയിലെ കഥാപാത്രങ്ങളിൽ ഒരാൾ ബിന്ദു പണിക്കർ ആണ്. ദിലീപ്, നവ്യ നായർ, മാന്യ എന്നിവർ കേന്ദ്രകഥാപാത്രങ്ങളായി. ഒരു ദിവസം നവ്യയും ഒത്തുള്ള ഒരു ഷോട്ട് എടുക്കവേ ബിന്ദു തീർത്തും പന്തികേടായി ഒരാൾ സെറ്റിന്റെ കോണിൽ നിൽക്കുന്നത് കണ്ടു

ഒരാൾ കണ്ണ് ചുവപ്പിച്ച്, കൈലി മുണ്ടുടുത്ത് വേലിക്കരികിൽ നിൽക്കുന്നു. ഷോട്ട് എടുത്തു തിരിച്ചു വരുമ്പോഴും അയാൾ അവിടെ നിന്നും നോക്കുന്നു. രണ്ടാമതും പോയി വന്നപ്പോൾ അയാൾ അവിടെ തന്നെ നിന്ന് സിഗരറ്റ് വലിക്കുന്നുണ്ടായിരുന്നു

'വശപിശകായി' കണ്ടയാൾ സായ് കുമാർ ആണെന്ന് ബിന്ദു പണിക്കർക്ക് മനസിലാക്കാൻ പിന്നെയും സമയമെടുത്തു. വാസു എന്ന കഥാപാത്രമാണ് സായ് കുമാർ ഈ സിനിമയിൽ ചെയ്തത്. പിൽക്കാലത്ത് ഏറെ ട്രോളുകൾ സമ്പാദിച്ച കഥാപാത്രം കൂടിയാണിത്

സായ് കുമാറുമൊത്ത് ഒരു ഇന്റർവ്യൂവിൽ പങ്കെടുക്കവെയാണ് ബിന്ദു ആ ഓർമ പങ്കിട്ടത്. ഒരു ഷാജി കൈലാസ് ചിത്രത്തിന് വേണ്ടി തല മൊട്ടയടിച്ച ലുക്കിലായിരുന്നു സായ് കുമാർ അന്ന്. ആ സിനിമയ്ക്ക് ശേഷമാണ് കുഞ്ഞിക്കൂനനിലെ ലുക്ക് എടുത്തത്

തലമുടി അൽപ്പം കിളിർത്തു വരുന്നതേയുണ്ടായിരുന്നുള്ളൂ. അത് അൽപ്പം കൂടി ട്രിം ചെയ്യാം എന്നായി മേക്കപ്പ് മാൻ പട്ടണം റഷീദ്. എന്നിട്ടും വാസു ആകുന്നില്ല. പിന്നെയാണ് ഏറെ ശ്രദ്ധപിടിച്ചുപറ്റിയ കൊമ്പൻ മീശയും ചുവന്നു തുടുത്ത കണ്ണുകളുമുള്ള ആ ലുക്കിലേക്ക് സായ് കുമാർ എത്തിച്ചേർന്നത്