ഡിസംബറിൽ പുതിയ അധ്യായം തുടങ്ങുകയാണ്; സൈനിക സേവനത്തെ കുറിച്ച് BTS താരം

ബിടിഎസ് ആർമിയെ നിരാശയിലാക്കുന്ന പ്രഖ്യാപനമാണ് ജങ്കൂക്ക് പ്രഖ്യാപിച്ചിരിക്കുന്നത്. ദിവസങ്ങൾക്കു മുമ്പ് ബിടിഎസ് അംഗങ്ങളുടെ നിർബന്ധിത സൈനിക സേവനം ഉടൻ ആരംഭിക്കുമെന്ന് ഏജൻസിയായ ബിഗ്ഹിറ്റ് അറിയിച്ചിരുന്നു.

ആർഎം, ജിൻ, വി, ജങ്കൂക്ക് എന്നീ താരങ്ങളാണ് ബിടിഎസിൽ സൈനിക സേവനം പൂർത്തിയാക്കാനുള്ളത്. മറ്റ് അംഗങ്ങളായ, ജിമിൻ, ജെ-ഹോപ്പ്, സുഗ എന്നീ താരങ്ങളുടെ സൈനിക സേവനം തുടരുകയാണ്.

തന്റെ സൈനിക സേവനത്തിനുള്ള തയ്യാറെടുപ്പുകൾ ഡിസംബറിൽ ആരംഭിക്കുമെന്ന് അറിയിച്ചിരിക്കുകയാണ് ജങ്കൂക്ക്. വരുന്ന ഡിസംബറിൽ ആർമിയോട് താത്കാലികമായി വിട പറയുകയാണെന്നും സൈനിക സേവനം ആരംഭിക്കുകയാണെന്നുമാണ് ജങ്കൂക്ക് അറിയിച്ചിരിക്കുന്നത്.

സൈനിക സേവനം പൂർത്തിയാക്കി മടങ്ങി വരുന്നതു വരെ തനിക്കു വേണ്ടി കാത്തിരിക്കണമെന്നും ജങ്കൂക്ക് ആരാധകരോട് അഭ്യർത്ഥിച്ചു. ഒരു വർഷവും ആറ് മാസവുമാണ് ദക്ഷിണ കൊറിയയിലെ നിർബന്ധിത സൈനിക സേവനത്തിന്റെ കാലയളവ്.

ഒരു വർഷവും ആറ് മാസവും വലിയ കാലയളവാണെന്നതിനാൽ സ്വാർത്ഥമായ കാര്യമാണ് താൻ ആവശ്യപ്പെടുന്നത് എന്നറിയാം. എങ്കിലും മടങ്ങി വന്നാൽ, ആർമിക്കു മുന്നിൽ സ്റ്റേജിലേക്ക് തിരിച്ചുവരുമെന്നും ജങ്കൂക്ക് ഉറപ്പ് നൽകി. കൂടുതൽ ഉയരങ്ങൾ കീഴടക്കുമെന്നും ജങ്കൂക്കിന്റെ ഉറപ്പ്.

തന്റെ സൈനിക സേവനകാലയളവിൽ ആരാധകർക്കെല്ലാം സന്തോഷം നിറഞ്ഞ ജീവിതം ഉണ്ടാകട്ടേയെന്നും ജങ്കൂക്ക് ആശംസിച്ചു. ആരാധകരെ വീണ്ടും കണ്ടുമുട്ടുന്ന ദിവസത്തിനായുള്ള തന്റെ കാത്തിരിപ്പ് ആരംഭിക്കുകയാണെന്നും താരം പറഞ്ഞു.