ക്രിസ് ഗെയിലിന് ദീപികയ്ക്കൊപ്പം അഭിനയിക്കണം; ബോളിവുഡാണ് ലക്ഷ്യമെന്ന് വിൻഡീസ് ക്രിക്കറ്റർ

ക്രീസിൽ ക്രിസ് ഗെയിൽ ഉണ്ടെങ്കിൽ ബോളർമാർക്ക് നെഞ്ചിടിപ്പേറും. ആ കരീബിയൻ വന്യതയുടെ ചൂടറിയാത്ത ബോളർമാർ കുറവായിരിക്കും. പേസെന്നോ സ്പിന്നെന്നോ വ്യത്യാസമില്ലാതെ പന്തുകൾ അതിർത്തിക്കപ്പുറത്തേക്ക് പറത്തുന്നതിൽ ഒരു ദാഷണ്യവും കാണിക്കാത്തയാളാണ് ക്രിസ് ഗെയിൽ.

ക്രിക്കറ്റിൽനിന്ന് വിരമിച്ച ക്രിസ് ഗെയിൽ ഇപ്പോൾ കലാരംഗത്ത് പുതിയ ഇന്നിംഗ്സിന് തുടക്കം കുറിച്ചിരിക്കുകയാണ്. ഇന്ത്യൻ സംഗീതഞ്ജൻ ആർക്കോ പ്രാവോ മുഖർജിക്കൊപ്പമുള്ള ക്രിസ് ഗെയിലിന്‍റെ 'ഓ ഫാത്തിമ' എന്ന സം​ഗീത ആൽബം ഹിറ്റായതോടെ ഗെയിൽ അഭിനയത്തിലേക്ക് തിരിയാനുള്ള മോഹം തുറന്നുപറയുകയാണ്.

ഇനി ബോളുവുഡാണ് തന്‍റെ ലക്ഷ്യമെന്നും താരം പറയുന്നു. ദീപിക പദുകോണിനൊപ്പം അഭിനയിച്ച് ബോളിവുഡിൽ അരങ്ങേറ്റം കുറിക്കുകയാണ് ആഗ്രഹമെന്നും ഗെയിൽ പറഞ്ഞു.

ഏറെ പ്രത്യേകതകളോടെയാണ് ഒ ഫാത്തിമ എന്ന ആൽബം പുറത്തിറങ്ങിയത്. ഇന്ത്യൻ സം​ഗീതവും ജമൈക്കൻ സം​ഗീതവും ഒരുമിച്ചതോടെ 'ഓ ഫാത്തിമ' വീഡിയോ ആൽബം സൂപ്പർഹിറ്റായി മാറുകയായിരുന്നു. ആൽബത്തിന്റെ രചനയും സം​ഗീതവും ക്രിസ് ​ഗെയിലും ആർക്കോ പ്രാവോ മുഖർജിയും ചേർന്നാണ് നിർവ്വഹിച്ചത്.

'ഇന്ത്യയിലും ഐപിഎല്ലിലുമുള്ള എന്റെ ക്രിക്കറ്റ് ജീവിതം ഒരിക്കലും മറക്കാനാകാത്തതാണ്. ഏറെക്കാലമായി സംഗീതരംഗത്ത് പ്രവർത്തിക്കണമെന്ന മോഹമാണ് 'ഓ ഫാത്തിമ' യാഥാർഥ്യമാകാൻ കാരണം. മികച്ച ഗാനം, മികച്ച ലൊക്കേഷനുകൾ, മികച്ച പങ്കാളിത്തം എന്നിവകൊണ്ട് ശ്രദ്ധേയമാണ് ഈ ആൽബം'- ഗെയിൽ പറഞ്ഞു.

'ഇനി ബോളിവുഡിൽ ഒരു സംഗീത ആൽബം ചെയ്യണം. അതും ദീപിക പദുക്കോണിനൊപ്പം അഭിനയിക്കണമെന്നാണ് എന്‍റെ ആഗ്രഹം'- ഗെയിൽ പറഞ്ഞു.