'കേട്ടതെല്ലാം ​ഗോസിപ്പല്ല'; വിജയ് വർമയുമായി പ്രണയത്തിലാണെന്ന് സ്ഥിരീകരിച്ച് തമന്ന

ബോളിവുഡ് നടൻ വിജയ് വർമയുമായി പ്രണയത്തിലാണെന്ന് സ്ഥിരീകരിച്ച് നടി തമന്ന. നേരത്തെ ഇരുവരും ഡേറ്റിങ്ങിലാണെന്നടക്കമുള്ള ഊഹപോഹങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ടായിരുന്നു. ഈ വാർത്തകള്‍ക്കാണ് നടി വിരാമമിട്ടിരിക്കുന്നത്. കേട്ടതെല്ലാം ഗോസിപ്പല്ലെന്നും വിജയ് വർമയുമായി പ്രണയത്തിലാണെന്നും തമന്ന വ്യക്തമാക്കിയിരിക്കുകയാണ്.

ലസ്റ്റ് സ്റ്റോറീസ് 2-ന്റെ സെറ്റിൽ വെച്ചാണ് വിജയ് വർമയുമായി അടുപ്പത്തിലായതെന്നും താൻ തേടിക്കൊണ്ടിരുന്നയാളാണ് അദ്ദേഹമെന്നും തമന്ന പറ‌‍ഞ്ഞു. ഫിലിം കമ്പാനിയനുമായി നടത്തിയ അഭിമുഖത്തിലാണ് പ്രണയവിവരം താരം വെളിപ്പെടുത്തിയത്.

'ഞാൻ ആഴത്തിൽ ശ്രദ്ധിക്കുന്ന ഒരു വ്യക്തിയാണ് വിജയ്.  അദ്ദേഹം എന്റെ സന്തോഷത്തിന്റെ ഇടമാണ്' തമന്ന പറഞ്ഞു. 'ഒരു പങ്കാളിയെ കണ്ടെത്താനായി, അയാളെ ബോധ്യപ്പെടുത്താനായി നിങ്ങള്‍ക്ക് പലതും ചെയ്യേണ്ടതായിവരും. പക്ഷേ ഞാന്‍ സൃഷ്ടിച്ചിട്ടുള്ള ലോകം എന്‍റെ യാതൊരു അധ്വാനവും കൂടാതെ മനസിലാക്കുന്ന ഒരാളെയാണ് ഇവിടെ ലഭിച്ചിരിക്കുന്നത്' അഭിമുഖത്തില്‍ തമന്ന പറയുന്നു.

ഗോവയിലെ പുതുവത്സര ആഘോഷത്തിനിടയിൽ പരസ്പരം ചുംബിക്കുന്ന സമൂഹമാധ്യമങ്ങളിൽ വൈറലായതിന് പിന്നാലെയാണ് ഇരുവരും തമ്മിലുള്ള ബന്ധം ചർച്ചവിഷയമായത്. നിരവധി പൊതുവേദികളിൽ ഒരുമിച്ച് പ്രത്യക്ഷപ്പെട്ടിട്ടും ഇരുവരും ഇതുവരെ ഈ ബന്ധത്തെ കുറിച്ച് തുറന്നു സംസാരിക്കാൻ തയ്യാറായിരുന്നില്ല.

അതേസമയം തമന്നയും വിജയിയും ഒരുമിച്ചഭിനയിച്ച ലസ്റ്റ് സ്റ്റോറീസ് 2 പ്രദർശനത്തിനൊരുങ്ങുകയാണ്. ആർ ബാൽക്കി, കൊങ്കണ സെൻ ശർമ്മ, സുജോയ് ഘോഷ്, അമിത് ശർമ്മ എന്നിവർ സംവിധാനം ചെയ്ത നാല് പുതിയ കഥകൾ ഉൾപ്പെടുന്ന ആന്തോളജിയാണ് ചിത്രം.