പുലിനഖം ലോക്കറ്റാക്കി റിയാലിറ്റി ഷോയിലെത്തി; ബിഗ് ബോസ് മത്സരാർത്ഥിയെ വനം വകുപ്പ് അറസ്റ്റ് ചെയ്തു

റിയാലിറ്റി ഷോയിൽ ഒറിജിനല്‍ പുലിനഖം മാലയിൽ  ലോക്കറ്റാക്കി കഴുത്തിലണിഞ്ഞെത്തിയ  മത്സരാര്‍ഥിയെ വനം വകുപ്പ് പിടികൂടി. കന്നട ബി​ഗ്ബോസ് പത്താം സീസൺ മത്സരാർത്ഥിയായ വർത്തൂർ സന്തോഷ് ആണ് അറസ്റ്റിലായത്. 

ബി​ഗ്ബോസ് വീട്ടിൽ നിന്നാണ് വനം വകുപ്പ് ഇയാളെ പിടികൂടിയത്. വന്യജീവി സംരക്ഷണ നിയമപ്രകാരമാണ് നടപടി.

മത്സരത്തിനിടെയാണ് ഇയാളുടെ കഴുത്തിൽ പുലിനഖം ലോക്കറ്റായി കിടക്കുന്ന മാല ശ്രദ്ധയിൽപ്പെട്ടത്. ഇതോടെ  പ്രേക്ഷകരിൽ ചിലരാണ് വനം വകുപ്പിന് ഇതുമായി ബന്ധപ്പെട്ട് പരാതി നൽകിയത്.

തുടർന്ന് വനം വകുപ്പ് ഉദ്യോഗസ്ഥർ ബിഗ് ബോസ് വീട്ടിലെത്തി മാല നൽകാൻ ആവശ്യപ്പെട്ടു. വിദഗ്ധ പരിശോധനയ്ക്ക് ശേഷം മാലയിലുള്ളത് ഒറിജിനൽ പുലി നഖങ്ങളാണെന്ന് വനംവകുപ്പ് സ്ഥിരീകരിച്ചു.

ഇതിന് പിന്നാലെ ബി​ഗ്ബോസ് ഷോ  അധികൃതരെ വിവരം അറിയിച്ചതിന് ശേഷം വനംവകുപ്പ് സെറ്റിലെത്തി മത്സരാർഥിയുടെ അറസ്റ്റ് രേഖപ്പെടുത്തി. മൂന്നു മുതൽ ഏഴു വർഷം വരെ തടവ് ശിക്ഷ ലഭിക്കാവുന്ന കേസാണിതെന്നും വനം വകുപ്പ് പറഞ്ഞു. 

അതേസമയം, വർത്തൂർ സന്തോഷിന്റെ കഴുത്തിലുണ്ടായിരുന്നത് യഥാര്‍ത്ഥ പുലിനഖമാണെന്ന് അറിയില്ലായിരുന്നു എന്നാണ് സഹമത്സരാര്‍ത്ഥികളുടെ പ്രതികരണം.

അറസ്റ്റിന് പിന്നാലെ 14 ദിവസത്തേക്ക് ഇയാളെ കോടതി റിമാൻഡ് ചെയ്തു. ജാമ്യത്തിനായുള്ള നീക്കം ആരംഭിച്ചതായി വർത്തൂർ സന്തോഷിന്റെ അഭിഭാഷകൻ അറിയിച്ചു.

കേസിന്റെ ഗൗരവം മനസിലാക്കി സന്തോഷിനെ തിരികെ ബിഗ് ബോസ് വിട്ടിലേക്ക് പ്രവേശിപ്പിക്കാൻ സാധ്യതയില്ലെന്നാണ് വിവരം.