നവ്യ നായർ പൊട്ടിക്കരയുന്ന വീഡിയോ കുത്തിപ്പൊക്കി; കലോത്സവകാലത്തെ മാറ്റമില്ലാത്ത ആചാരം!

വീണ്ടുമൊരു കലോത്സവ കാലമെത്തി. കൊല്ലത്താണ് കലോത്സവമെങ്കിലും അതിന്‍റെ ആവേശം കലയെ സ്നേഹിക്കുന്ന കേരളത്തിലെ മറ്റിടങ്ങളിലെല്ലാമുണ്ട്. മാധ്യമങ്ങളും കലോത്സവം ആവേശമാക്കുമ്പോൾ എവിടെയും നിറയുന്നത് കലോത്സവ വിശേഷങ്ങൾ തന്നെ.

ഓരോ കലോത്സവം എത്തുമ്പോഴും മുറതെറ്റാതെ നടത്തുന്ന ആചാരം ഇത്തവണയും! എന്താണെന്നല്ലെ, കലോത്സവ വേദയിൽ കലാതിലക പട്ടം ലഭിക്കാത്തതിന് നടി നവ്യാ നായർ പൊട്ടിക്കരയുന്ന വീഡിയോ ഇത്തവണയും സോഷ്യൽ മീഡിയയിൽ വൈറലാകുന്നു.

2001ൽ കലോത്സവത്തിലാണ് ഈ കഥ നടക്കുന്നത്. അന്നത്തെ വിദ്യാഭ്യാസമന്ത്രി പി.ജെ ജോസഫിന്‍റെ നാടായ തൊടുപുഴയിലായിരുന്നു കലോത്സവം. പതിവുപോലെ വീറും വാശിയേറിയ പോരാട്ടത്തിനാണ് തൊടുപുഴ സാക്ഷ്യം വഹിച്ചത്. അന്നത്തെ കലോത്സവങ്ങൾക്ക് ഏറെ ഗ്ലാമർ പരിവേഷം നൽകിയത് കലാ പ്രതിഭാ-കലാ തിലക പട്ടങ്ങളായിരുന്നു.

സിനിമയിലേക്കുള്ള വഴി എളുപ്പം തുറക്കുമെന്നതിനാലാണ് പ്രതിഭാ-തിലക പട്ടത്തിനായുള്ള മത്സരത്തിന് വാശി കൂടിയത്. തൊടുപുഴ കലോത്സവത്തിൽ കലാതിലക പട്ടത്തിനായി നേർക്കുനേർ പോരാടിയത് പിൽക്കാലത്ത് സിനിമയിൽ താരമായ രണ്ടു കലാകാരികളായിരുന്നു. ഒന്ന് നവ്യാ നായരും രണ്ട് അമ്പിളി ദേവിയും.

കായംകുളത്തുകാരിയ നവ്യനായ‍രും കൊല്ലംകാരിയായ അമ്പിളി ദേവിയും തമ്മിൽ ഇഞ്ചോടിഞ്ച് പോരാട്ടം തന്നെ നടന്നു. എന്നാൽ നേരിയ വ്യത്യാസത്തിൽ കലാതിലകപ്പട്ടം അമ്പിളി ദേവി സ്വന്തമാക്കി. മൂന്ന് എ ഗ്രേഡ് ഒന്നാം സ്ഥാനങ്ങളോടെയാണ് അമ്പിളിദേവി വിജയിയായത്.

എന്നാൽ അമ്പിളിദേവിക്കെതിരെ രൂക്ഷമായ വിമ‍ശനവുമായാണ് അന്ന് ധന്യ എന്ന് അറിയപ്പെട്ട നവ്യ രംഗത്തെത്തിയത്. മാധ്യമങ്ങളോട് പ്രതികരിക്കവെ പൊട്ടിക്കരഞ്ഞുകൊണ്ടാണ് നവ്യ സംസാരിച്ചത്. 'ആ കുട്ടി സ്റ്റേജിൽ ഒന്നും ചെയ്തില്ല, ഫിലിം സ്റ്റാറായതുകൊണ്ട് മാത്രം കിട്ടിയതാണ്'- വികാരാധീനയായി നവ്യ പറഞ്ഞു.

ഓരോ കലോത്സവം എത്തുമ്പോഴും നവ്യയുടെ ഈ വീഡിയോ സോഷ്യൽ മീഡിയയിൽ തരംഗമാകാറുണ്ട്. ഇത്തവണയും അതിന് മാറ്റമില്ല. തൊടുപുഴ കലോത്സവ വേദിയിൽ നവ്യ നായർ പൊട്ടിക്കരയുന്ന വീഡിയോ ഈ കലോത്സവ നാളുകളിലും സോഷ്യൽ മീഡിയയിൽ ചർച്ചയാകുകയാണ്.