ജീവിതത്തിൽ ടോക്സിക്കായ മനുഷ്യരെ ഉപേക്ഷിക്കുവെന്ന് പരിണീതി ചോപ്ര; ആരെ ഉദ്ദേശിച്ചാണ് ഈ പോസ്റ്റെന്ന് ആരാധകർ

ബോളിവുഡ് താരം പരിനീതി ചോപ്രയ്ക്ക് ആരാധകർ നിരവധിയാണ്. താരം സോഷ്യൽ മീഡിയയിൽ പങ്കുവയ്ക്കുന്ന ചിത്രങ്ങളും വീഡിയോകളും നിമിഷ നേരം കൊണ്ടാണ് വൈറലാകുന്നത്.

ഇപ്പോഴിതാ അത്തരത്തിൽ താരം പങ്കുവച്ച പുതിയ പോസ്റ്റാണ് ആരാധകർക്കിടയിൽ ചർച്ചയാകുന്നത്.താടിക്ക് കൈകൊടുത്ത് ചിന്തയിലിരുന്ന് ബോട്ട് യാത്ര ചെയ്യുന്ന വിഡിയോയാണ് പരിണീതി ചോപ്ര പങ്കുവച്ചത്.

ഇതിനു താഴെ ഇങ്ങനെ കുറിച്ചു;‘പ്രാധാന്യമില്ലാത്ത കാര്യങ്ങൾ അങ്ങനെ കാണണം. ഒരു നിമിഷം പോലും പാഴാക്കരുത്. സമയം ഓടിക്കൊണ്ടിരിക്കുകയാണ്. മറ്റുള്ളവർക്കു വേണ്ടി ജീവിക്കുന്നത് ഒഴിവാക്കണം. ജീവിതത്തിൽ ടോക്സിക്കായ മനുഷ്യരെ ഉപേക്ഷിക്കൂ. ജീവിതം അനന്തമാണ്.’’

വീഡിയോ പങ്കുവച്ച് നിമിഷങ്ങൾക്കകം തന്നെ നിരവധി ആരാധകരാണ് കമന്റുകളുമായി എത്തുന്നത്. ‘ആരെ ഉദ്ദേശിച്ചാണ് ഈ പോസ്റ്റ്’ എന്നായിരുന്നു കമന്റുകളിൽ പലരുടെയും ചോദ്യം. എന്താണ് ഈ വിഡിയോയിലൂടെ ഉദ്ദേശിക്കുന്നതെന്നു ചോദിച്ചവരും നിരവധിയാണ്.

അതേസമയം നിങ്ങൾക്ക് ഞങ്ങളുണ്ട്, ഈ കാലവും കടന്നു പോകും എന്നിങ്ങനെ പരിണീതിയെ ആശ്വസിപ്പിക്കുന്ന രീതിയിലുള്ള നിരവധി കമന്റുകളും എത്തി.

കഴിഞ്ഞ വർഷമാണ് പരിനീതി ചോപ്രയുടെ വിവാഹം കഴിഞ്ഞത്. ആംആദ്മി നേതാവ് രാഘവ് ഛദ്ദാണ് ഭർത്താവ്. ഇവരുടെയും വിവാഹ ചടങ്ങുകളുടെ ചിത്രങ്ങളടക്കം സമൂഹ മാധ്യമങ്ങളിൽ വൈറലാവുകയും ചെയ്തിരുന്നു.