50 ലക്ഷത്തിന്റെ മേഴ്‌സിഡസ് ബെൻസ് നൂറ് രൂപയ്ക്ക് സ്വന്തമാക്കി വിദ്യാര്‍ഥിനി

അസമിലെ ബാര്‍പേട സ്വദേശിയായ വിദ്യാര്‍ഥിനിക്ക് 50 ലക്ഷം രൂപ വിലവരുന്ന ആഢംബരക്കാര്‍ സമ്മാനമായി ലഭിച്ചു. പ്ലസ് ടു വിദ്യാര്‍ഥിനിയായ ദിഷ ദാസ് നൂറ് രൂപയ്‌ക്കെടുത്ത ഭാഗ്യക്കുറിയിലൂടെയാണ് മേഴ്സിഡസ് ബെന്‍സ് സമ്മാനമായി ലഭിച്ചത്.

ഭാഗ്യക്കുറി വിജയിയായി പ്രഖ്യാപിച്ചതിന് ശേഷം സംഘാടകർ മേഴ്‌സിഡസ് ബെന്‍സ് കിരീടം ദിഷയെ അണിയിച്ചു. 2024 ഫെബ്രുവരിയില്‍ നടക്കുന്ന നാഷണല്‍ ബാര്‍പേട്ട ബുക്ക് ആന്‍ഡ് സയന്‍സ് ഫെയറിനോട് അനുബന്ധിച്ചാണ് ഭാഗ്യക്കുറി സംഘടിപ്പിച്ചത്.

സമ്മാനക്കൂപ്പണിലെ ഒന്നാം സമ്മാനം മേഴ്‌സിഡസ് ബെന്‍സ് കാര്‍ ആയിരുന്നു. കൗണ്ടറില്‍ നിന്നാണ് ദിഷ ദാസ് സമ്മാനക്കൂപ്പണ്‍ എടുത്തത്. താന്‍ സൂക്ഷിച്ചുവെച്ചിരുന്ന പണം ഉപയോഗിച്ച് രണ്ട് കൂപ്പണുകളാണ് ദിഷ വാങ്ങിയത്. ഇതില്‍ ഒരു കൂപ്പണിനാണ് ദിഷയ്ക്ക് ഒന്നാം സമ്മാനം ലഭിച്ചത്.

ദിഷയ്ക്ക് ഒന്നാം സമ്മാനം ലഭിച്ചതറിഞ്ഞ് മാതാപിതാക്കളും ആവേശത്തിലാണ്. ഫെയ്‌സ്ബുക്ക് ലൈവിലൂടെയാണ് നറുക്കെടുപ്പ് നടത്തിയത്. ലൈവായി നറുക്കെടുപ്പ് കണ്ട ദിഷ സമ്മാനമടിച്ചത് അറിഞ്ഞ് സന്തോഷം കൊണ്ട് തുള്ളിച്ചാടി.

ലൈവിനിടെ തന്റെ കൈയ്യിലുള്ള ടിക്കറ്റ് നമ്പര്‍ നറുക്കെടുത്ത നമ്പറുമായി ഒത്തു വന്നപ്പോള്‍ ദിഷ സന്തോഷത്താല്‍ കരയുകയായിരുന്നു. ബാര്‍പേട്ട ബുക്ക് ഫെയര്‍ കമ്മിറ്റി ദിഷ ദാസിന് കാര്‍ സമ്മാനിച്ചു.