ഹണിമൂണിനിടെ പ്രിയതമയ്ക്ക് പിറന്നാള്‍; പരിണീതി ചോപ്രയ്ക്കൊപ്പമുള്ള പ്രണയകാല ചിത്രങ്ങളുമായി രാഘവ് ചദ്ദ

ബോളിവുഡ് താരസുന്ദരി പരിണീതി ചോപ്രയും ആംആദ്മി പാർട്ടി എംപി രാഘവ് ചദ്ദയുമായുള്ള വിവാഹം സോഷ്യല്‍ മീഡിയ വലിയ രീതിയില്‍ തന്നെ ആഘോഷിച്ചിരുന്നു.

രാജസ്ഥാനിലെ ഉദയ്പൂരിൽ കൊട്ടാര സമാനമായ വേദിയിൽ നടന്ന വിവാഹചടങ്ങിൽ ബന്ധുക്കളും അടുത്ത സുഹൃത്തുക്കളും മാത്രമാണ് പങ്കെടുത്തിരുന്നത്.

വിവാഹശേഷം ഹണിമൂൺ യാത്രകളുടെ തിരക്കിലാണ് പരിണീതിയും പങ്കാളിയും. ഇതിനിടെ കടന്നുവന്ന താരത്തിന്റെ 35-ാം പിറന്നാൾ ദിനം ഇരുവരും ചേർന്ന് ആഘോഷിച്ചു.

വിവാഹശേഷമുള്ള പ്രിയതമയുടെ ആദ്യ പിറന്നാൾ ദിനത്തില്‍ പ്രണയം നിറയുന്ന വാചകങ്ങളുമായി ഒരു കുറിപ്പും പ്രണയകാലത്തെ ചില മനോഹര നിമിഷങ്ങളും രാഘവ് ചദ്ദ പങ്കുവെച്ചു. 

'ഒരു സൂപ്പര്‍സ്റ്റാറിനെ പോലെ നീ എന്റെ ജീവിതത്തില്‍ പ്രകാശം പരത്തി. വെല്ലുവിളി നിറഞ്ഞതും തിരക്കേറിയതുമായ എന്റെ ജീവിതത്തെ മനോഹരമാക്കാന്‍ നിന്റെ ചിരി മാത്രം മതി. ഒരുപാട് സന്തോഷമാണ് നീ എന്റെ ലോകത്തേക്ക് കൊണ്ടുവന്നത്. 

ഈ പ്രത്യേക ദിനത്തില്‍ നിന്നിലെ ഗംഭീരയായ സ്ത്രീയെ ആഘോഷിക്കാന്‍ ഞാന്‍ ആഗ്രഹിക്കുന്നു. കൂടുതല്‍ ചിരിയും സ്‌നേഹവും ഒന്നിച്ചുള്ള മറക്കാനാവാത്ത നിമിഷങ്ങളും നമുക്ക് സൃഷ്ടിക്കാം, നമ്മള്‍ ഒന്നിച്ച ആദ്യത്തെ വര്‍ഷത്തേത് പോലെ. ഹാപ്പി ബര്‍ത്ത്‌ഡേ വൈഫീ' -രാഘവ് കുറിച്ചു.

ഏറെ നാളത്തെ പ്രണയത്തിന് ശേഷമായിരുന്നു കഴിഞ്ഞ സെപ്റ്റംബറിൽ ഇരുവരും വിവാഹിതരായത്. 

തീൻമേശയിലെ ആദ്യ ചാറ്റ് മുതൽ, തങ്ങളുടെ ഹൃദയങ്ങൾ സ്നേഹം അറിഞ്ഞിരുന്നു. ഈ ദിവസത്തിനായി ഏറെ നാളുകൾ കാത്തിരുന്നു. ഭാര്യാ ഭർത്താക്കന്മാരായി അനുഗ്രഹിക്കപ്പെട്ടിരിക്കുന്നു' വിവാഹ ചിത്രം പങ്കുവെച്ച് പരിണീതി കുറിച്ചു.