സൽമാൻ ഖാന് ഇത്രയും വലിയ രോ​ഗമുണ്ടായിരുന്നോ? ഒടുവിൽ ആ രഹസ്യവും പുറത്ത്

ബോളിവുഡിലെ 'മസിൽ ഹീറോ' എന്നറിയപ്പെടുന്ന നടനാണ് സൽമാൻ ഖാൻ. തൻ്റെ അഭിനയ മികവിനും താരപ്പൊലിമയ്ക്കും പുറമെ മികച്ച ശരീര സൗന്ദര്യത്തിന്റെ പേരിലും അദ്ദേഹം പ്രശസ്തനാണ്. എന്നാൽ, നിരവധി സൂപ്പർ ഹിറ്റുകൾ നൽകിയ ഈ താരത്തിന് യഥാർത്ഥ ജീവിതത്തിൽ ചില വലിയ ആരോഗ്യ പ്രശ്‌നങ്ങൾ നേരിടുന്നുണ്ട്. താരം തന്നെ ഈ രോഗാവസ്ഥയിൽ നിന്ന് മുക്തി നേടാൻ ശ്രമിച്ചിട്ടുള്ളതായും പറയപ്പെടുന്നു.

സൽമാൻ ഖാൻ അടുത്തിടെ ഒരു പരിപാടിയിലാണ് തൻ്റെ ആരോഗ്യപ്രശ്നത്തെക്കുറിച്ച് പരസ്യമായി വെളിപ്പെടുത്തിയത്. ഇത് ആരാധകരെയും സിനിമാലോകത്തെയും ഒരുപോലെ അത്ഭുതപ്പെടുത്തി. ട്വിങ്കിൾ ഖന്നയും കാജോളും അവതാരകരായ "ടൂ മച്ച് വിത്ത് ട്വിങ്കിൾ ആൻഡ് കാജോൾ" എന്ന ടോക്ക് ഷോയിൽ അതിഥിയായി പങ്കെടുത്തപ്പോഴാണ് സൽമാൻ ഖാൻ തൻ്റെ സ്വകാര്യ ജീവിതത്തെക്കുറിച്ചുള്ള ഈ നിർണായക വിവരങ്ങൾ പങ്കുവെച്ചത്.

'ട്രൈജമിനൽ ന്യൂറൽജിയ' (Trigeminal Neuralgia) എന്ന അപൂർവ നാഡീരോഗത്താലാണ് സൽമാൻ ഖാൻ ബുദ്ധിമുട്ടുന്നത്. ഈ അവസ്ഥ മുഖത്തെ ഞരമ്പുകളെയാണ് ബാധിക്കുന്നത്. ഇത് മുഖത്ത് പെട്ടെന്ന് അസഹനീയമായതും കുത്തുന്നതുമായ വേദന ഉണ്ടാക്കുന്നു. പല്ല് തേക്കുക, ഭക്ഷണം കഴിക്കുക, സംസാരിക്കുക തുടങ്ങിയ ലളിതമായ ജോലികൾ പോലും ഈ രോഗാവസ്ഥയിൽ സൽമാൻ ഖാന് കഠിനമായ വേദനയ്ക്ക് കാരണമാകും. "ചിലപ്പോൾ വേദന കാരണം ജീവിക്കാൻ പോലും തോന്നുകയില്ലെന്നാണ് നടൻ പറയുന്നത്. ജീവനൊടുക്കുന്നതിനെ കുറിച്ച് പോലും ചിന്തിക്കാറുണ്ടെന്നാണ് സൽമാൻ ഖാൻ തുറന്നു പറഞ്ഞത്. താൻ നേരിടുന്ന ഈ വലിയ വെല്ലുവിളിയെക്കുറിച്ചുള്ള സൽമാന്റെ തുറന്നുപറച്ചിൽ ആരോഗ്യരംഗത്തും സിനിമാരംഗത്തും ചർച്ചാവിഷയമായിരിക്കുകയാണ്.

ഇന്ത്യൻ സിനിമയിലെ ഏറ്റവും വലിയ താരങ്ങളിലൊരാളാണ് സൽമാൻ ഖാൻ എങ്കിലും സമീപകാലത്ത് അദ്ദേഹത്തിന്റെ കരിയർ അത്ര വിജയകരമല്ല. ഷാരൂഖ് ഖാൻ നായകനായ 'പഠാൻ' എന്ന ചിത്രത്തിൽ ചെറിയൊരു വേഷത്തിൽ അദ്ദേഹം പ്രത്യക്ഷപ്പെട്ടിരുന്നു. എന്നാൽ, നായകനായി അഭിനയിച്ച 'സിക്കന്ദർ' എന്ന ചിത്രം തിയേറ്ററുകളിൽ പ്രതീക്ഷിച്ച പ്രകടനം കാഴ്ചവെച്ചില്ല. നിലവിൽ, 'ഗാൽവാൻ' എന്ന മറ്റൊരു ചിത്രത്തിലാണ് സൽമാൻ ഖാൻ അഭിനയിച്ചുകൊണ്ടിരിക്കുന്നത്.

കരിയറിലെ വെല്ലുവിളികൾ നിലനിൽക്കുമ്പോഴും, തൻ്റെ ആരോഗ്യപ്രശ്നത്തെക്കുറിച്ച് ധൈര്യത്തോടെ സംസാരിച്ചതിന് ആരാധകരും സിനിമാ പ്രവർത്തകരും സൽമാൻ ഖാനെ പിന്തുണയ്ക്കുകയാണ്. സ്‌ക്രീനിൽ എത്ര ശക്തനായി പ്രത്യക്ഷപ്പെട്ടാലും എല്ലാ മനുഷ്യർക്കും അവരുടേതായ കഷ്ടപ്പാടുകൾ ഉണ്ടെന്ന് അദ്ദേഹം സ്വന്തം ജീവിതത്തിലൂടെ തെളിയിച്ചു. സമാനമായ രോഗങ്ങളാൽ ബുദ്ധിമുട്ടുന്ന നിരവധിപേർക്ക് സൽമാൻ്റെ ഈ തുറന്നുപറച്ചിൽ വലിയ ധൈര്യമാണ് നൽകിയിരിക്കുന്നത്.