പതിനാറു മുതൽ 36 വയസ്സു വരെ; പിറന്നാൾ ദിനത്തിൽ ജീവിത വഴികൾ ഓർത്ത് സാമന്ത

അതിജീവനത്തിന്റെയും പോരാട്ടത്തിന്റെയും പ്രതീകമാണ് നടി സമാന്ത റൂത്ത് പ്രഭു. താരത്തിന്റെ 36-ാം പിറന്നാൾ ദിവസമാണ് ഇന്ന്. തന്റെ ജീവിതത്തെ വർണിക്കുന്ന ചില ചിത്രങ്ങൾ സോഷ്യൽ മീഡിയയിലൂടെ പങ്കുവയ്ക്കുകയാണ് സാമന്ത.

പതിനാറാം വയസ്സിൽ പകർത്തിയ ചിത്രവും അതിൽ ഉൾപ്പെടുന്നുണ്ട്. ബ്ലാക്ക് ആൻഡ് വൈറ്റ് എഫക്റ്റിൽ പങ്കുവച്ച ചിത്രത്തിനു താഴെ “എനിക്ക് 16 വയസ്സായിരുന്നപ്പോൾ” എന്നാണ് താരം കുറിച്ചത്.

സാമന്ത ഏറെ സ്നേഹിക്കുന്ന തന്റെ അരുമകളായ ഹഷ്, സാഷ എന്ന പട്ടികുട്ടികളുടെ ചിത്രവും പോസ്റ്റിലുണ്ട്. ഓക്സിജൻ മാസ്ക്ക് വച്ചിരിക്കുന്ന ഒരു ചിത്രവും സാമന്ത പങ്കുവച്ചിരിക്കുകയാണ്. ഇതിന്റെ വിശദീകരണമായി ഒരു സ്ക്രീൻഷോർട്ടും ഷെയർ ചെയ്തു.

കുറച്ചു നാളുകൾക്ക് മുൻപാണ് തനിക്ക് മയോസൈറ്റിസ് രോഗാവസ്ഥയാണെന്ന് സാമന്ത വെളിപ്പെടുത്തിയത്. മയോസിറ്റിസ് എന്ന രോഗാവസ്ഥയുമായി മല്ലിടുമ്പോഴും തന്റെ സിനിമാ ജീവിതം കോട്ടംതട്ടാതെ കൊണ്ടുപോകാൻ സമാന്ത വളരെയേറെ പ്രയത്നിക്കുന്നുണ്ട്.

കുതിര സവാരി, പരസ്യ ചിത്രത്തിനായുള്ള ഷൂട്ടിന്റെ ചെറിയ ഭാഗങ്ങൾ, ഭക്ഷണം, വർക്കൗട്ട് ചിത്രങ്ങൾ എന്നിവയും പങ്കുവച്ചിട്ടുണ്ട്. ഇതിനോടൊപ്പം രബീന്ദ്രനാഥ് ടാഗോറിന്റെ വാക്കുകളും താരം ഷെയർ ചെയ്‌തു.

‘ഞാൻ ഇതെല്ലാം എങ്ങനെ നോക്കി കാണുന്നു’ എന്നാണ് ചിത്രങ്ങൾക്ക് സാമന്ത നൽകിയ അടികുറിപ്പ്.

നിങ്ങൾ മാനസികമായി വളരെ കരുത്തുള്ളവരാണ്, ശക്തയായി തിരിച്ചുവരൂ സാം എന്നിങ്ങനെയുള്ള കമന്റുകളാണ് പോസ്റ്റിനു താഴെ നിറയുന്നത്.