'ബാബ ലവ്സ് യു': മകന്റെ ജന്മദിനം ആഘോഷിച്ച് ഷൊയ്ബ് മാലിക്; ചിത്രങ്ങളിൽ ഒപ്പം പോസ് ചെയ്യാതെ സാനിയ മിർസ

മകന്റെ അഞ്ചാം പിറന്നാൾ ആഘോഷത്തിനായി ഒന്നിച്ചിരിക്കുകയാണ് പാകിസ്ഥാൻ ക്രിക്കറ്റ് താരം ഷൊയ്ബ് മാലിക്കും ഇന്ത്യൻ ടെന്നീസ് താരം സാനിയ മിർസയും.

ദുബായില്‍ നടന്ന ആഘോഷത്തിന്റെ ചിത്രങ്ങള്‍ ഷൊയ്ബ് മാലിക്ക് സോഷ്യൽ മീഡിയയിലൂടെ പങ്കുവെച്ചു.

പിറന്നാള്‍ കേക്കിനൊപ്പം ഷൊയ്ബും ഇസ്ഹാനും നില്‍ക്കുന്നതാണ് ചിത്രങ്ങളിലുള്ളത്. പശ്ചാത്തലത്തില്‍ സഹോദരി അനം മിര്‍സയുടെ മകള്‍ ദുഅയെ എടുത്തുനില്‍ക്കുന്ന സാനിയയേയും കാണാം.

ഇരുവരും വിവാഹ മോചിതരാകുകയാണെന്ന റിപ്പോര്‍ട്ടുകള്‍ പുറത്തുവന്നിട്ട് കുറച്ച് കാലമായി. ഇരുവരും ഇപ്പോള്‍ താമസം ഒരുമിച്ചല്ലെന്നും മകന്‍ ഇസ്ഹാന്‍ മിര്‍സ മാലിക്കിന് വേണ്ടിയാണ് കൂടിക്കാഴ്ച്ചകളെന്നും റിപ്പോര്‍ട്ടുകളുണ്ടായിരുന്നു.

എന്നാൽ ഇപ്പോൾ പങ്കുവെച്ച ചിത്രങ്ങൾ ഇരുവരും വീണ്ടും ഒന്നിക്കുന്നതിന്റെ ശുഭസൂചനയാണോയെന്ന് ആരാധകര്‍ ചോദിക്കുന്നു. എന്നാല്‍ സാനിയയും ഷൊയ്ബും ഒരുമിച്ച് പോസ് ചെയ്തിട്ടില്ലെന്നും ഇരുവരും തമ്മില്‍ അസ്വാരസ്യങ്ങളുണ്ടെന്നതാണ് ഇതില്‍ നിന്ന് മനസിലാക്കേണ്ടതെന്നും ചില ആരാധകര്‍ കമന്റ് ചെയ്തിട്ടുണ്ട്.

മകന് പിറന്നാള്‍ ആശംസ നേര്‍ന്ന് സാനിയയും ഇന്‍സ്റ്റഗ്രാമില്‍ വികാരനിര്‍ഭരമായ കുറിപ്പ് പങ്കുവെച്ചിട്ടുണ്ട്. മകന്റെ ചിരി തന്റെ ചുറ്റുമുള്ള ഇരുട്ടിനെ മായ്ച്ചുകളയുമെന്നും ഉപാധികളില്ലാത്ത സ്നേഹം എന്താണെന്ന് കാണിച്ചുതന്നതിന് ഒരുപാട് നന്ദിയെന്നും സാനിയ കുറിച്ചു.

ഒപ്പം പിറന്നാളാഘോഷത്തിനിടെ എടുത്ത കുടുംബ ചിത്രങ്ങളും സാനിയ പോസ്റ്റ് ചെയ്തിട്ടുണ്ട്. ഈ ചിത്രങ്ങളില്‍ ഷൊയ്ബിന്‌‍റെ അഭാവവും ആരാധകര്‍ ചൂണ്ടിക്കാണിക്കുന്നു.

2010 ഏപ്രിലിലാണ് സാനിയയും ഷൊയ്ബും വിവാഹിതരായത്. 2018 ഒക്ടോബര്‍ 30-ന് ഇരുവര്‍ക്കും കുഞ്ഞ് പിറന്നു.