സവാദ് അനുകൂലികൾക്ക് വിശ്രമമില്ല; അശ്വതി ശ്രീകാന്തിന്റെ പോസ്റ്റിനു താഴെ പുരുഷ പുംഗവന്മാരുടെ ആറാട്ട്

യാത്രക്കാർ നിറഞ്ഞ ബസിനുള്ളിൽ വച്ച് യുവതിക്ക് മുന്നേ അശ്ലീല പ്രദർശനം നടത്തി ജയിലിലായ സവാദ് പുറത്തിറങ്ങിയ ശേഷം വമ്പൻ സ്വീകരണമാണ് ഓൾ കേരള മെൻസ് അസോസിയേഷൻ എന്ന സംഘടന നൽകിയത്. ഇത്തരമൊരു പ്രവണത നാട്ടിൽ നടക്കുമ്പോൾ പ്രതികരണ ശേഷി നഷ്‌ടപ്പെട്ടിട്ടില്ലാത്ത പലരും രംഗത്തെത്തി. അവതാരകയും അഭിനേത്രിയുമായ അശ്വതി ശ്രീകാന്ത് (Aswathy Sreekanth) പ്രതികരണം രേഖപ്പെടുത്തിയവരുടെ മുൻപന്തിയിൽ തന്നെയുണ്ട്

'സ്വീകരണം കൊടുത്തതിലല്ല, ‘ഓൾ കേരള മെൻസ് അസോസിയേഷൻ’ എന്നൊക്കെ പറഞ്ഞ് വെളിവും ബോധവും ഉള്ള ബാക്കി ആണുങ്ങളെ കൂടി നാണം കെടുത്താൻ ശ്രമിക്കുന്നതിലാണ് സങ്കടം' എന്നായിരുന്നു അശ്വതിയുടെ പ്രതികരണം. എന്നാൽ നാട്ടിൽ സ്ത്രീകൾക്ക് ലഭിക്കുന്ന യഥാർത്ഥ ബഹുമാനവും, വെറും കവല പ്രസംഗങ്ങളും എത്രത്തോളം ഉണ്ട് എന്നതിന് ഉദാഹരണം അശ്വതിയുടെ പോസ്റ്റിനു താഴെയുള്ള സവാദ് അനുകൂലികളെ കണ്ടാൽ മനസിലാകും (തുടർന്ന് വായിക്കുക)

പലരും രൂക്ഷമായി അശ്വതിയെ വിമർശിച്ചു എങ്കിൽ, അവരിൽ കഴിയുന്നത്ര പേർക്ക് തിരിച്ച് മറുപടി നൽകാൻ അശ്വതി തയാറായി. 'സത്യം അറിയുന്നതിന് മുമ്പ് ഇങ്ങനെ പറയുന്നത് ശരിയല്ല, ആണുങ്ങളുടെ കാര്യം എങ്കിലും ആണുങ്ങൾക്ക് വിടൂ' എന്നൊരാൾ. 'സത്യം അറിയും മുൻപ് സ്വീകരണം കൊടുക്കാമോ' എന്ന് അശ്വതി

'സ്ത്രീകൾക്ക് വേണ്ടി ശബ്ദിക്കാൻ നൂറായിരം സംഘടനകൾ ഉള്ള ഈ കാലത്ത് ആണുങ്ങൾക്കും ഒരു സംഘടന ഉണ്ടാവുന്നതിൽ എന്ത് തെറ്റാണ് കാണുന്നത്' എന്ന നീതി ബോധമാണ് മറ്റൊരു ചേട്ടന്. 'വളരെ നല്ലതാണ് എന്ന് പറയുവായിരുന്നു' എന്ന് കുറിക്കുകൊള്ളുന്ന മറുപടിയുമായി അശ്വതി

'കമന്റ് ഇട്ട എല്ലാവരും ഭ്രാന്തന്മാരല്ല അശ്വതി ...ഒരു പക്ഷം പിടിക്കുന്നതിനു മുൻപ് സത്യം എന്താണെന്നു തിരക്കുക എങ്കിലും വേണമാരുന്നു ...ഏതോ ഒരു ആണിൽ നിന്നും കിട്ടിയ മോശം അനുഭവം കൊണ്ട് മുഴുവന് അടച്ചു ആക്ഷേപിക്കല്ലേ അശ്വതി' എന്ന് വേറൊരാൾ. 'ഞാൻ ഇവിടെ എവിടെയാണ് ആണുങ്ങളെ ആക്ഷേപിച്ചത്' എന്ന അശ്വതിയുടെ ചോദ്യത്തിൽ ആളുടെ വായടഞ്ഞു. അങ്ങനെ അനവധി കമന്റുകളും അതിനുള്ള മറുപടിയും ഈ പോസ്റ്റിനു താഴെ വന്നിട്ടുണ്ട്

സമയം കളഞ്ഞ് ഇതിനെല്ലാം മറുപടി കൊടുത്തിട്ടും കാര്യമില്ല എന്ന് മനസിലായ ശേഷം ഒരു കമന്റ് പിൻ ചെയ്തുവച്ച ശേഷം അശ്വതി ബൈ പറഞ്ഞു. 'എന്റെ ഭാഗത്തും തെറ്റുണ്ട്. ഈ സംഘടനയിൽ ഇത്രേം ആളുണ്ടെന്ന് എനിക്ക് അറിയില്ലാരുന്നു. കമന്റ് ബോക്സ് അവർ കൈയടക്കി ഗയ്‌സ് ! ഞാൻ പോണ്... ബൈ' എന്ന് അശ്വതി കുറിച്ചു