'വിവാഹ ദിവസം മുതല്‍ അമ്മ കരയുകയാണ്; ഇന്ന് അവരെ ഒരുപാട് മിസ് ചെയ്യുന്നു'; സൊനാക്ഷി

ദീർഘ നാളത്തെ പ്രണയത്തിനൊടുവിലാണ് ബോളിവുഡ് താരങ്ങളായ സൊനാക്ഷി സിൻഹയും സഹീർ ഇക്ബാലും വിവാഹിതരായത്. വിവാഹവാർത്തയ്ക്ക് പിന്നാലെ വലിയ രീതിയിലുള്ള വിമര്‍ശനങ്ങളാണ് താരത്തിനു നേരിടേണ്ടി വന്നത്.

സോഷ്യല്‍ മീഡിയയിൽ സജീവമായ താരം വിവാഹ ചിത്രങ്ങൾ ആരാധകരുമായി പങ്കുവച്ചിരുന്നു. ഇപ്പോഴിതാ വിവാഹത്തിനിടെ എടുത്ത വികാരനിര്‍ഭരമായ ചിത്രങ്ങള്‍ പങ്കുവച്ച് എത്തിയിരിക്കുകയാണ് താരം.

സൊനാക്ഷിയുടെ മാതാപിതാക്കളായ ശത്രുഘ്‌നന്‍ സിന്‍ഹയും പൂനം സിന്‍ഹയുമാണ് ചിത്രത്തിലുള്ളത്. ബ്ലാക്ക് ആൻഡ് വൈറ്റ് മോഡലിലുള്ള ചിത്രങ്ങളാണ് താരം പങ്കുവച്ച് എത്തിയിരിക്കുന്നത്.

ചിത്രത്തിൽ‌ കരച്ചില്‍ നിയന്ത്രിക്കാന്‍ കഴിയാതിരുന്ന ഇരുവരേയും സൊനാക്ഷി ആശ്വസിപ്പിക്കുന്നത് കാണാം.ഇതിനൊപ്പം മനോഹരമായൊരു കുറിപ്പും നടി പങ്കുവെച്ചിട്ടുണ്ട്.

'എന്റെ വിവാഹ ദിവസം മുതല്‍ അമ്മ കരയുകയാണ്. ഞാന്‍ വീട് വിട്ടുപോകുന്നതിന്റെ സങ്കടമാണ് അമ്മയുടെ മനസ് നിറയെ. എന്തിനാണ് വിഷമിക്കുന്നതെന്നും ജുഹുവിന്‍ നിന്ന് ബാന്ദ്രയിലേക്ക് 25 മിനിറ്റ് ദൂരമേയുള്ളൂവെന്നും ഞാന്‍ അമ്മയോട് പറഞ്ഞു.

എനിക്കും ഇന്ന് അവരെ ഒരുപാട് മിസ് ചെയ്യുന്നുണ്ട്. അതുകൊണ്ട് ഞാന്‍ അമ്മയോട് പറഞ്ഞ അതേ കാര്യം ഞാന്‍ എന്നോടും പറയുകയാണ്.' സൊനാക്ഷി കുറിച്ചു. ഇത്തവണയും പോസ്റ്റിന്റെ കമന്റ് ഓഫാക്കിയിട്ടാണുള്ളത്.

കഴിഞ്ഞ ജൂണ്‍ 23-നായിരുന്നു സൊനാക്ഷി സിന്‍ഹയുടേയും സഹീര്‍ ഇഖ്ബാലിന്റേയും വിവാഹം. ലളിതമായി നടന്ന രജിസ്റ്റര്‍ വിവാഹത്തിനുശേഷം ഇരുവരും അടുത്ത സുഹൃത്തുക്കള്‍ക്കും കുടുംബാംഗങ്ങള്‍ക്കും റിസപ്ഷനും ഒരുക്കിയിരുന്നു.