ജമന്തിയും മുല്ലയും കൊണ്ട് അലങ്കരിച്ച സ്വപ്നതുല്യമായ വിവാഹവേദി; കെ എൽ രാഹുലും അതിയയും വിവാഹിതരായത് ഇവിടെ

കെഎൽ രാഹുലിന്റേയും അതിയ ഷെട്ടിയുടേയും വിവാഹ വിശേഷങ്ങൾ അവസാനിക്കുന്നില്ല. ജനുവരി 23 നാണ് ഇന്ത്യൻ ക്രിക്കറ്റ് താരവും ബോളിവുഡ് നടൻ സുനിൽ ഷെട്ടിയുടെ മകളും തമ്മിലുള്ള വിവാഹം നടന്നത്.

ഓരോ ദിവസവും വിവാഹത്തെ കുറിച്ചുള്ള പുതിയ വാർത്തകളും വിശേഷങ്ങളുമാണ് പുറത്തുവരുന്നത്. സുനിൽ ഷെട്ടിയുടെ ഖണ്ടാലയിലെ ഫാംഹൗസിൽ വെച്ച് എഴുപത് പേർ മാത്രം പങ്കെടുത്ത ചടങ്ങിലായിരുന്നു വിവാഹം.

ഫാംഹൗസിലെ വിവാഹവേദിയാണ് ഇപ്പോൾ സോഷ്യൽമീഡിയയിൽ ചർച്ചയാകുന്നത്. ഒറ്റവാക്കിൽ സ്വപ്നതുല്യം എന്ന് വിശേഷിപ്പിക്കാവുന്നതാണ് അതിയയുടേയും രാഹുലിന്റേയും വിവാഹവേദി.

ഖണ്ടാലയിൽ സുനിൽഷെട്ടിയുടെ വമ്പൻ ബംഗ്ലാവ് മനോഹരമായാണ് വിവാഹത്തിനായി അണിയിച്ചൊരുക്കിയത്. ഹൽദി ചടങ്ങിന് മഞ്ഞ ജമന്തി പൂക്കളാലും വിവാഹത്തിന് മുല്ലപ്പൂക്കളുമായാണ് വേദി അലങ്കരിച്ചത്.

ഇൻസ്റ്റഗ്രാമിൽ റാണി പിങ്ക് ലൗവ് എന്ന പേജിലാണ് വിവാഹവേദിയുടെ ചിത്രങ്ങൾ പുറത്തുവിട്ടത്. പഴമയുടെ പ്രൗഢി നിറഞ്ഞ ഫാം ഹൗസിനെ കൂടുതൽ മനോഹരമാക്കിയാണ് വെഡ്ഡിങ് പ്ലാനറായ റാണി വേദി അണിയിച്ചൊരുക്കിയത്.

ഫാം ഹൗസിലെ വൻമരത്തിനു കീഴിലാണ് വിവാഹത്തിന് മുമ്പുള്ള പൂജ നടന്നത്. ഇതിനായി മുല്ലപ്പൂക്കളാണ് ഉപയോഗിച്ചത്.

വിവാഹത്തിന്റെ ഓരോ ദിവസവും വ്യത്യസ്ത തീമിലാണ് ഫാം ഹൗസ് അണിയിച്ചൊരുക്കിയതെന്നാണ് വെഡ്ഡിങ് പ്ലാനർ ഇൻസ്റ്റഗ്രാമിൽ കുറിച്ചത്.

ഹൽദി ചടങ്ങിന് മഞ്ഞ ജമന്തി ഉപയോഗിച്ചായിരുന്നു അലങ്കാരം. തറ മുതൽ സീലിംഗ് വരെ ജമന്തി തോട്ടത്തിൽ മുങ്ങിയെന്നാണ് ഇൻസ്റ്റഗ്രാമിലെ കുറിപ്പിൽ വിശേഷിപ്പിച്ചത്.