COVID 19| ലോക്ക്ഡൗൺ ലംഘിച്ച് കുർബാനയും ജുമുഅ നമസ്കാരവും: 59 പേർ അറസ്റ്റിൽ

കോവിഡ് ലോക്ക്ഡൗൺ ലംഘിച്ച് കുർബാനയും ജുമുഅ നമസ്കാരവും നടത്തിയതിന് 59 പേർ അറസ്റ്റിലായി. ആലുവ, കൂത്താട്ടുകുളം, ഈരാറ്റുപേട്ട, പത്തനംതിട്ട, മലപ്പുറം വളന്നൂർ, കാളികാവ് എന്നിവിടങ്ങളിലാണ് നടപടി.

കോവിഡ് നിയന്ത്രണങ്ങളുടെ ഭാഗമായി കൂട്ടംകൂടിയുള്ള മതപരമായ ചടങ്ങുകള്‍ നടത്താൻ പാടില്ലെന്നിരിക്കെ ആലുവ കക്കാട്ടുപാറ സെയ്ന്റ് മേരീസ് യാക്കോബായ ചാപ്പലിലും കൂത്താട്ടുകുളം ആട്ടിൻകുന്ന് സെയ്ന്റ് മേരീസ് ഓർത്തഡോക്സ് പള്ളിയിലുമാണ് കുർബാന നടന്നത്.

കക്കാട്ടുപ്പാറയിൽ വികാരി ഫാ. ഗീവർഗീസ് ചെങ്ങനാട്ടുകുഴി ഉൾപ്പെടെ അഞ്ചുപേരെയും ആട്ടിൻകുന്നിൽ ഫാ. ഗീവർഗീസ് ജോൺ ഉൾപ്പെടെ എട്ടുപേരെയും അറസ്റ്റ് ചെയ്തു.

ഈരാറ്റുപേട്ട നടയ്ക്കൽ തന്മിയ സ്കൂളിലെ മറിയം മർഹുമ മദ്രസയിൽ പ്രാർത്ഥനക്കായി ഒത്തുകൂടിയ എസ്ഡിപിഐ നേതാക്കൾ ഉൾപ്പെടെ 23 പേരും പൊലീസിന്റെ പിടിയിലായി. പത്തനംതിട്ട കുലശേഖരപതിയിലെ ഒരു വീട്ടിൽ നിസ്കാരം നടത്തിയ പത്തുപേരെ അറസ്റ്റ് ചെയ്തു.

വളവന്നൂർ കുറുക്കോൾക്കുന്ന് പാറോട്ടക്കൽ നൂറുൽ ഹുദാ ജുമാ മസ്ജിദിൽ വെള്ളിയാഴ്ച ഉച്ചയ്ക്ക് ജുമുഅയ്ക്കെത്തിയ എട്ടപരും കാളികാവ് ചോക്കാട് പന്നിക്കോട്ടുമുണ്ട വാളക്കുളത്തെ പള്ളിയിൽ നിർദേശം ലംഘിച്ച് സംഘടിത നമസ്കാരം നടത്തിയ അഞ്ചുപേരെയുമാണ് അറസ്റ്റ് ചെയ്തത്.